Iyi mpanuka yabaye ku wa Gatandatu, tariki ya 3 Ukwakira 2026, ahagana saa tanu za mu gitondo (11:00), ku cyambu cya Buruku, ubwo ubwato bwari butwaye abantu baturutse muri Gboko Local Government Area bagiye ku itabaro.
Raporo ya Polisi ivuga ko ubwato bwagize ikibazo cy’uko moteri yabwo yanze gukora, bigatuma abari baburimo bagira ubwoba, cyane cyane ko benshi muri bo batari basanzwe bamenyereye gutembera mu mazi.
Inkuru dukesha ikinyamakuru Punch Newspaper ivuga ko, Umuyobozi w’Akarere ka Buruku, Raymond Zege, yemeje iby’iyi mpanuka, avuga ko ubwato bwari bwuzuye abantu barenze ubushobozi bwabwo.
Yasobanuye ko ubwo moteri yapfaga, abagenzi batangiye guhagarika umutima no kugenda nabi mu bwato, mu gihe abari baje gutabara bageragezaga kubagezaho ubundi bwato.
Ati: “Abenshi muri bo ntabwo bari bamenyereye amazi, batangiye kugira ubwoba no kugenda nabi. Mbere y’uko babagezaho ubwato bwo kubatabara, kubera uburemere bw’abantu n’imiraba y’amazi, ubwato bwararohamye.”
Zege yavuze ko kugeza ubu abarenga 70 bamaze gutabarwa, ariko hakaba hakiri abantu batandatu batari baboneka.
Uyu muyobozi yanenze bamwe mu bagenzi badakurikiza amabwiriza y’umutekano wo mu mazi, cyane cyane ajyanye no kwambara amakoti abarinda kurohama (life jackets).
Yavuze ko Leta yatanze ayo makoti ku bantu bambuka muri ako gace, ariko hari abagenzi batayambara cyangwa bakarwanya abakozi bashinzwe umutekano badashaka kubahiriza ayo mabwiriza.
Ku rundi ruhande, Komiseri ushinzwe Marine and Blue Economy muri Leta ya Benue, Denis Iyaghigba, yavuze ko amakuru y’ibanze bahawe agaragaza ko ubwato bwahuye n’umuvuduko ukabije w’amazi, bukajyanwa ku bwato bunini bwari bwarasigaye mu mazi (abandoned barge).
Yavuze ko ubwato bwahise butembagara nyuma yo gukubitana n’iyo barge, bikaba ari byo byateye iyo mpanuka. Yatangaje ko yategetse abakora ubwikorezi bwo mu mazi n’ishyirahamwe ryabo gufasha mu bikorwa byo gushakisha no gutabara abataraboneka.
Yasabye imiryango y’abari muri ubwo bwato gutuza no gutegereza amakuru yemejwe n’inzego zibishinzwe, ashimangira ko ibikorwa byo gushakisha no gutabara bikomeje.