Ni ubwa mbere benshi baririmbye muri BK Arena! Abahanzi batunguranye bakoze ijoro rya King James ridasanzwe

Abari bitabiriye iki gitaramo bari biteze kubona King James wenyine aririmba indirimbo zamugize icyamamare. Gusa uko amasaha yagendaga ashira, byahindutse igitaramo cyahuzaga ibisekuru bitandukanye by'abahanzi, bamwe bamaze imyaka myinshi mu muziki, abandi bakizamuka, ndetse hari na benshi bahise bandika amateka yabo yo gukandagira ku rubyiniro rwa BK Arena ku nshuro ya mbere.

Byabaye ijoro ritari iryo kwizihiza King James gusa, ahubwo ryahindutse urubuga rwo guha icyubahiro inshuti, abafatanyabikorwa n'abahanzi bagize uruhare mu rugendo rwe.

King V ni we wafunguye urubuga rw'amateka

Mbere y'uko King James agaragara ku rubyiniro, King V ni we wabanje gushyushya igitaramo.

Uyu muhanzi uri mu bagezweho mu muziki nyarwanda yari amaze iminsi agaragaza icyifuzo cyo kuririmba muri iki gitaramo. Mu kiganiro King James yari yagiranye n'itangazamakuru mbere y'igitaramo, yemeye ko yabonye impano ye ndetse amusezeranya kuzamwemerera kuririmba.

Ibyo yabivuze ntiyabigarukaho gusa, ahubwo yabishyize mu bikorwa.

King V yaririmbye indirimbo zirimo "Tattoo", "Suwawe (Kwihoma)", "Tossa" na "Narahindutse", yerekana ko ashoboye kwihagararaho imbere y'imbaga y'abafana barenga ibihumbi 10.

Zuba Ray yanditse amateka ye bwa mbere muri BK Arena

Mu gihe igitaramo cyari kimaze gufata indi ntera, King James yahamagaye Zuba Ray, umwe mu bahanzikazi bashya ba Kina Music.

Byari ubwa mbere uyu mukobwa akandagira ku rubyiniro rwa BK Arena.

Yahise aririmbana na King James indirimbo "Ikirezi", imwe mu ndirimbo nshya ziri gukundwa muri iyi minsi.

Nyuma yo kuyiririmba, King James yafashe umwanya ashimira Miss Nishimwe Naomie n'umugabo we bagize uruhare mu ifatwa ry'amashusho y'iyo ndirimbo.

Yagize ati: "Zuba arakoze. Dushimire cyane Naomie wadufashije mu mashusho y'iyi ndirimbo."

Byari ibihe byagaragaje uburyo King James adatinya gushimira abantu bamufashije mu rugendo rwe, kabone n'iyo baba batari abahanzi.

Clement Ishimwe yasubije benshi inyuma mu mateka ya King James

Mu bice byakoze ku mitima y'abitabiriye iki gitaramo, nta cyarutaga igihe King James yahamagaraga Ishimwe Clement, washinze Kina Music.

Ntabwo yamuhamagaye ngo baririmbe gusa.

Yabanje gusangiza abafana amateka atari azwi na benshi, avuga ko hari igihe yari ageze aho yumva ashobora guhagarika umuziki bitewe n'ibibazo yari arimo.

Yavuze ko Clement Ishimwe ari we wamugaruriye icyizere, akamugira inama yo gutangira gukora indirimbo zituje, icyemezo cyaje guhindura amateka y'urugendo rwe.

Ati: "Maze kugera aho numva sinzi icyo nakora. Ni Clement wamfashije kongera kwiyizera, anangira inama yo gutangira gukora indirimbo zituje."

Nyuma y'aya magambo, Clement yicaye kuri piano y'umweru yari itatse indabo, bombi bacuranga banaririmba "Amahitamo" na "Ese Warikiniraga".

Ni umwe mu myanya waranzwe n'ituze, amarangamutima n'amashyi menshi.

Mu gihe bari ku rubyiniro, insakazamashusho za BK Arena zagaragaje Butera Knowless wari mu bafana, ibintu byakiriwe n'impundu zidasanzwe.

Ariel Wayz yagarutse mu nzu asanzwe azi

Ku isaha ya saa tatu n'iminota 52, Ariel Wayz yinjiye ku rubyiniro aririmbana na King James indirimbo "Ndagukumbuye."

Nubwo atari ubwa mbere yari aririmbiye muri BK Arena, uburyo yakiriwe bwagaragaje ko iyi ndirimbo imaze kugira abakunzi benshi.

Nyuma ye hakurikiyeho Itorero Inyamibwa, ryafatanyije na King James kuririmba "Igitekerezo," ritanga uburyohe bw'umuco n'umuziki gakondo hagati mu gitaramo.

Nicolas Peek yagaruye ibihe bya kera

Ku isaha ya saa tanu n'iminota ibiri, King James yabwiye abafana ko hari indirimbo yakuranye akunda cyane.

Akimara kubivuga yahamagaye Nicolas Peek.

Bombi bahise baririmba "Kugasozi," indirimbo imaze imyaka myinshi ariko kugeza ubu igifite umwanya ukomeye mu mitima y'abakunzi b'umuziki nyarwanda.

Abafana bayiririmbye ijambo ku rindi, ibintu byagaragaje uburyo umuziki mwiza utajya usaza.

Manick Yani yanditse amateka muri BK Arena

Hashize iminota mike, Manick Yani na we yahamagariwe ku rubyiniro.

Yafatanyije na King James kuririmba "Akayobe," agaruka imbere y'abafana nyuma y'igihe kinini atagaragara cyane mu muziki.

Uyu muhanzi yanditse amateka ye kuko ari bwo bwa mbere yari aririmbiye muri BK Arena. Yakiriwe n'urugwiro rw'abafana benshi bagaragaje ko bari bamukumbuye.

Mico The Best na we yabonye BK Arena bwa mbere

Ku isaha ya saa tanu n'iminota 11, Mico The Best yinjiye ku rubyiniro yambaye imyambaro yiganjemo umutuku n'umukara.

Yaririmbanye na King James indirimbo "Umugati." Mu buryo butari bwateguwe, abafana batangiye gusaba Mico kubaririmbira "Igare."

Ntibyamusabye gutekereza kabiri. Yabahaye agace gato k'iyo ndirimbo, ibintu byatumye ibyishimo birushaho kwiyongera.

Nk'abandi benshi bagaragaye muri iki gitaramo, na we yari ageze muri BK Arena bwa mbere nk'umuhanzi uri ku rubyiniro.

Danny Nanone yagaruye Hip Hop hagati mu gitaramo

Danny Nanone ni we muraperi rukumbi watunguranye muri iki gitaramo.

Ku isaha ya saa tanu n'iminota 16, yinjiye ku rubyiniro aririmbana na King James indirimbo "Ijanisha." Byabaye nko kongera gusubiza Hip Hop ku rubyiniro rwari rwiganjemo R&B na Afro-pop.

Yongeye no guhura n'imbaga y'abafana barenga ibihumbi 10, ibintu byaherukaga kumubaho mu bitaramo bikomeye byo mu Rwanda.

Shaffy yasoreje ku rwego rwo hejuru

Mu bahanzi batunguranye, Shaffy ni we wasoje uru rutonde. Uyu muhanzi umaze imyaka myinshi mu muziki yageze ku rubyiniro aririmba "Akabanga," indirimbo yahise ihinduka iy'abafana kuko bayiririmbye kuva ku ntangiriro kugeza ku musozo.

Na we yanditse amateka yo kuririmba muri BK Arena bwa mbere. Mu gusoza, yakuye ikoti ry'umutuku yari yambaye aritera mu bafana, ibintu byatumye impundu zongera kuzamuka mu nzu yose.

King James yizihije amateka ye ayasangira n'abandi

Igitaramo cya King James ntabwo cyabaye gusa icyo kwizihiza imyaka 20 amaze mu muziki.

Cyagaragayemo abahanzi bakizamuka bahawe urubuga, abamufashije mu bihe bikomeye bahawe icyubahiro, inshuti ze bahuriye ku rubyiniro ndetse n'abahanzi bamaze igihe badakora ibitaramo bikomeye bongera guhura n'abakunzi babo.

Ikirenze byose, cyabaye ijoro ryanditse amateka mashya kuko benshi muri abo bahanzi, barimo King V, Zuba Ray, Mack Yanyi, Mico The Best na Shaffy, bari bageze muri BK Arena bwa mbere nk'abaririmbye ku rubyiniro rwayo.

Ibyo ni byo byatumye ijoro ryo ku wa 1 Kanama 2026 ridahora mu mateka ya King James gusa, ahubwo rihinduka imwe mu mpapuro zidasibangana mu mateka y'umuziki nyarwanda, aho umuhanzi umwe yahisemo kwizihiza urugendo rwe atarwigaruriye wenyine, ahubwo arusangira n'abamufashije kurugeraho n'abazakomeza kurwubakira.

King James yahuriye ku rubyiniro na Zuba Ray baririmbana indirimbo 'Ikirezi' yamamaye muri iki gihe

Umuraperi Danny Nanone yaririmbanye na King James indirimbo yitwa 'Ijanisha' yamamaye

King James yaririmbye acungiwe na Ishimwe Karake Clement wamufashije mu rugendo rw'umuziki

King James yahuriye ku rubyiniro na Mico The Best bakoranye indirimbo 'Umugati'

King V yaririmbye muri iki gitaramo, nyuma yo guhabwa amahirwe na King James

Kanda hano urebe amafoto menshi yaranze igitaramo cya King James