Mu gihe SIM Card isanzwe ari agakarita gato ushyira muri telefoni, eSIM (Embedded SIM) ni SIM yubakiwe imbere muri telefoni kuva ikozwe. Ntishobora gukurwamo cyangwa gusimbuzwa nk'uko bikorwa kuri SIM Card isanzwe.
Iyo ushaka gukoresha umurongo mushya, aho gushyiramo SIM nshya, ubona QR Code cyangwa andi makuru uhabwa n'isosiyete y'itumanaho, maze ukayashyira muri telefoni. Mu minota mike, umurongo uba watangiye gukora.
Iri koranabuhanga ryatangiye gukoreshwa cyane nyuma ya 2018, ariko mu myaka ya vuba ni bwo ryihuse gukwira. Ibigo nka Apple, Samsung, Google n'ibindi byatangiye gusohora telefoni zishyigikira eSIM, ndetse muri bimwe mu bihugu, telefoni nshya za Apple ntizigifite umwanya wo gushyiramo SIM Card isanzwe.
Impamvu nyamukuru ituma abakora telefoni bakunda eSIM ni uko ibafasha gukora telefoni zifite umwanya munini w'ibindi bikoresho nka batiri nini cyangwa ibindi byuma by'ikoranabuhanga. Nanone, igabanya ibyago byo kwangirika kw'ahashyirwa SIM Card.
Ku ruhande rw'abakoresha, eSIM ituma byoroha guhindura umuyoboro cyangwa gukoresha imirongo ibiri icyarimwe. Urugero, umuntu ashobora kugira umurongo umwe w'akazi n'undi wihariye muri telefoni imwe, cyangwa akongeramo umurongo wo mu kindi gihugu atagiye gushaka SIM nshya.
Abakora ingendo mpuzamahanga ni bamwe mu bungukira cyane kuri eSIM. Bashobora kugura internet y'igihugu bagiyemo mbere yo kuhagera, bakayikoresha bagezeyo badakeneye gushaka aho bagurira SIM Card.
Ese SIM Card zisanzwe zigiye gucika?
Ntabwo ari ubu. Nubwo eSIM iri gukwirakwira vuba, ibihugu byinshi n'ibigo by'itumanaho biracyakoresha SIM Card zisanzwe. Telefoni nyinshi zikiri ku isoko zishyigikira uburyo bwombi kugira ngo abakoresha bahitemo ibyo bashaka.
Ariko inzobere mu ikoranabuhanga ziteganya ko mu myaka iri imbere, eSIM izagenda ifata umwanya munini kurushaho, cyane cyane muri telefoni zo ku rwego rwo hejuru, amasaha y'ubwenge (smartwatches) n'ibindi bikoresho bihuzwa na internet.
Ubushakashatsi bwa GSMA, umuryango uhuriza hamwe ibigo by'itumanaho ku Isi, bugaragaza ko umubare w'ibikoresho bikoresha eSIM ukomeje kwiyongera buri mwaka. Abasesenguzi bavuga ko iri koranabuhanga rizagira uruhare runini mu gukwirakwiza internet ku bikoresho byinshi birimo imodoka zigezweho, amasaha y'ubwenge n'ibindi bikoresho bya Internet of Things (IoT).
eSIM ntabwo ihindura gusa uburyo dukoresha telefoni, ahubwo ihindura n'uburyo twihuza n'imiyoboro y'itumanaho. Nubwo SIM Card zisanzwe zitaracika burundu, eSIM irerekana icyerekezo cy'ejo hazaza, aho guhindura umurongo bizaba bikorwa mu masegonda make, hadakoreshejwe agakarita na kamwe.