Ni igisubizo cy’amasengesho yanjye - Liliane Kabaganza ku gitaramo cya Richard Nick Ngendahayo i Kigali

Liliane wamamaye mu ndirimbo nka 'Yesu Ndakwihaye', 'Yakoze Imirimo' n'izindi ziramya zirimo izivuga ku gukomeza kwizera n’ubuntu bw’Imana akaba yaranamamaye bikomeye muri Rehoboth Ministries, yavuze ko yakurikiranye urugendo rwa Richard Nick Ngendahayo kuva kera, akabona uburyo Imana imukoresha mu buryo budasanzwe mu kuruhura imitima y’abantu.

Mu kiganiro cyihariye yagiranye na InyaRwanda, Liliane Kabaganza yagize ati: “Richard Ngendahayo arimo kuduhesha umugisha mu gihugu cya Kenya. Imana igukomereze amaboko kandi izagukoreshe iby’ubutwari mu gikorwa ufite mu Rwanda.”

Nk’umuririmbyi w’imyaka irenga 20 mu murimo wo kuramya, Liliane avuga ko indirimbo za Ngendahayo zifite ubutumwa bwimbitse, butuma umuntu yongera kugira icyizere n’amahoro mu mutima.

Ati: “Twari mu buriri ntungurwa no kumva DJ acurangiye indirimbo ye ababyinnyi basusurutsaga ibirori. Indirimbo ze ziramfasha cyane cyane ‘Cyubahiro’. Ndayikunda cyane, sinjya nyihaga.”

Iyi ndirimbo “Cyubahiro” yagiye ikundwa n’abantu benshi ku buryo yarenze imbibi z’u Rwanda, ikaba imwe mu ndirimbo zigaragaza neza uburyo Richard Ngendahayo ahuza impano ye n’ubutumwa bw’ihumure.

Liliane akomeza avuga ko Ngendahayo ari umwe mu bahanzi yigeze gusengera igihe kirekire, asaba Imana kuzamugarura imbere y’Abanyarwanda ngo bongere kumubone amaso ku maso.

Ati: “Mu by’ukuri iki gitaramo kuri njye nagisobanura nk’igisubizo cy’amasengesho yanjye nahoraga nsenga Imana mvuga nti ‘Mana, wagaruye Richard Ngendahayo akongera kuduhesha umugisha.’”

Richard Nick Ngendahayo, umaze imyaka irenga 24 mu murimo wo kuramya no guhimbaza Imana, azwiho indirimbo zafashije imitima ya benshi nka “Cyubahiro”, “Niwe”, “Ntwari Batinya”, “Yambaye Icyubahiro” n’izindi.

Liliane Kabaganza avuga ko impano ya Richard irenze ijwi — ari impano yo kuririmbisha umutima no kuvuga ku Mana nk’iyo yigeze guhura nayo mu buzima bwe bwite.

Ati: “Yafashije imitima ya benshi nanjye ndimo. Ndamukunda cyane. Rero aziye igihe kandi ku isaha nziza Imana yagennye. Richard mufata nk’umuramyi uririmbisha umutima. Yandika neza, aririmba neza, aririmbisha umutima.”

Abamukurikira bamumenyereye mu mico yo kwicisha bugufi no guha Imana icyubahiro mbere ya byose, ibintu byamugize umwe mu baramyi bubashywe muri ‘Gospel’ nyarwanda no mu karere.

Ku wa 29 Ugushyingo 2025, BK Arena izakira ibihumbi by’abazitabira igitaramo cyiswe “Richard Nick Ngendahayo Live in Kigali”, cyitezweho kuba umwe mu minsi y’amasengesho n’amashimwe azibukirwa igihe kirekire.

Byitezwe ko azafatanya n’abandi baramyi barimo abaturutse mu Rwanda no hanze, bose bafitanye isano y’iyerekwa rimwe, guha Imana icyubahiro no gufasha imitima kugarura ibyiringiro.

Nubwo Liliane Kabaganza, atazabasha kuboneka muri BK Arena uwo munsi, avuga ko umutima we uzaba uhari mu buryo bw’umwuka, anasaba abanyarwanda kudacikanwa n’iki gitaramo cy’amateka.

Ati: “Ndasaba cyane kandi ndinginga abatuye mu Rwanda kuzitabira iki gitaramo. Nanjye muzahambere, mbabajwe n’uko ntari hafi ngo nzahabe. Muhabwe umugisha.”

Kanda hano ubashe kugura itike yo kwinjira mu gitaramo “NiweHealing Live Concert” cya Richard Nick Ngendahayo

"Ni igisubizo cy’amasengesho yanjye” – Liliane Kabaganza avuga ku gitaramo cya Richard Nick Ngendahayo kizabera muri BK Arena, avuga ko kubona agaruka kuririmbira mu Rwanda ari ibyishimo bikomeye mu buzima bwe bw’umwuka

Umuramyi Liliane Kabaganza yashimiye Imana ku bwo kugarura Richard Nick Ngendahayo kuririmbira i Kigali, avuga ko indirimbo ze zifite ubushobozi bwo gukiza imitima myinshi

“Indirimbo Cyubahiro yaramfashije cyane. Sinjya nyihaga.” - Liliane Kabaganza ashimangira uko umuziki wa Richard Nick Ngendahayo wamufashije gukomeza kwizera, avuga ko uyu muhanzi ari “uririmbisha umutima" 

“Yafashije imitima ya benshi nanjye ndimo. Ndamukunda cyane!” – Liliane Kabaganza avuga ku buryo umuziki wa Richard Nick Ngendahayo wakomeje kuba isoko y’ihumure n’icyizere ku baramyi benshi mu karere 

Igitaramo Richard Nick Ngendahayo gitegerejwe nk’umunsi w’amateka muri Gospel nyarwanda, umunsi w’amashimwe, amasengesho n’ubusabane n’Imana muri BK Arena

Ku bwa Liliane Kabaganza, igitaramo cya Richard Nick Ngendahayo si igitaramo gusa, ni igisubizo cy’amasengesho y’abantu benshi bari barategereje kongera kumva ijwi rye ryuzuye umutuzo n’icyubahiro cy’Imana

KANDA HANO UREBE IKIGANIRO CYIHARIYE TWAGIRANYE NA RICHARDNICK NGENDAHAYO