Mu kwezi gushize ni bwo uyu mukinnyi yavunitse ubwo ikipe ye y'igihugu ya Brazil yatsindwaga na Uruguay mu gushaka itike y'igikombe cy'Isi.
Haje gufatwa umwanzuro ko agomba kubagwa ndetse birakorwa bigenda neza none birashoboka ko uyu mwaka w'imikino warangira atagarutse mu kibuga.
Kuri ubu ikipe ye ya Al Hilal yafashe umwanzuro wo kwandukuza Neymar mu bakinnyi bayo kugira ngo umwanya we bazandikishemo undi mukinnyi bateganya kugura nk'uko ikinyamakuru The Sun cyabyanditse.
Ubundi amategeko muri shampiyona ya Arabia Saudite avuga ko ikipe yemerewe kwandikisha abakinnyi 8 badakomoka muri Arabia Saudite kandi iyi kipe yarabujuje.
Umutoza wa Al Hilal ukomoka muri Portugal, Jorge Jesus arashaka kugura undi mukinnyi wa myugariro w'ibumoso kugira ngo arebe ko yakwegukana igikombe cya shampiyona akaba ariyo mpamvu Neymar agiye kuba yandukujwe ubundi akazagarurwamo nyuma yakize bagize n'undi bakuramo udakenewe cyane.
Ubusanzwe Al Hilal abakinnyi ifite bakomoka hanze ya Arabia Saudite ni Umunya-Maroc, Yassine Bounou, Umunya-Senegal Kalidou Koulibaly, Umunya-Portugal Ruben Neves, Abanya -Serbian Sergej Milinkovic-Savic na Aleksandar Mitrovic ndetse n'Abanya-Brazil Brazil Malcolm, Michael na Neymar.
Ikipe ya Al Hilal iri mu gihombo gikomeye kuko Neymar yavunitse nta mikino myinshi abakiniye kandi baramutanzeho agera kuri Miliyoni 78 kugira ngo ve muri Paris Saint-Germain kandi bakaba banasabwa kumuhemba ibifurumba by'amafaranga.
Neymar wandukujwe mu bakinnyi ba Al Hilal
Neymar yagize ikibazo cy'imvune kizatuma ashobora kumara umwaka wose w'imikino atarakandagira mu kibuga
Umutoza wa Al Hilal wafashe umwanzuro ko Neymar yandukuzwa mu bandi bakinnyi kugira ngo abone uko agura undi mukinnyi ukomeye
