Britney Cariño, ukuriye restaurant ya Talavera Cantina i Bronx, yashyize ku mbuga nkoranyambaga amashusho ya camera z’umutekano agaragaza abantu batatu bivugwa ko bavuye muri restaurant batishyuye fagitire y’amadolari 112.
Cariño yavuze ko umwe muri abo bagore yafashe agasanduku kari karimo fagitire akagashyira munsi y’isakoshi ye mbere yo gusohoka. Yagize ati: “Umwe muri abo bagore yafashe ako gasanduku kari karimo fagitire, akagashyira munsi y’isakoshi ye. Bongeye kureba hirya no hino, hanyuma ni bwo basohotse.”
Cariño yavuze ko atahise ahamagara polisi kuko yumvaga ko hari igihe polisi idashobora kugira icyo ikora kuri bene ibyo bikorwa. Ati: “Igitekerezo cya mbere nagize si uguhamagara polisi, kuko mu by’ukuri, hari igihe nta cyo polisi ishobora gukora.”
Nyuma yo gushyira amashusho ku mbuga nkoranyambaga, umwe mu bavandimwe b’umwe mu bariye muri iyo restaurant yaje kwishyura ya fagitire.
Abandi bafite restaurants na bo bavuga ko iki kibazo kimaze gukomeza kubangamira ibikorwa byabo, cyane cyane ko hari abantu barya amafunguro menshi bagasohoka batishyuye.
John Truong ukuriye Chef Papa, yavuze ko hari umuntu wiyitaga influencer wariye akananywa ibifite agaciro k’amadolari hafi 200, ariko agasiga amadolari 6 gusa y’inyongera ku bakozi. Yagize ati: “Twizeye uyu muntu ko aje gukora amashusho, ariko numva yaratubeshye.”
Restaurant ya UMI Hotpot Sushi & Seafood Buffet na yo iri mu zikoresha imbuga nkoranyambaga mu kugaragaza abantu bakekwaho kurya bagasohoka batishyuye. Iyi restaurant yashyizeho ahantu yise “Wall of Shame”, hagaragazwa amafoto y’abantu bakekwaho ibyo bikorwa.
Abahanga mu bijyanye n’umutekano n’iperereza bavuga ko restaurants zigomba kubika amashusho ya camera z’umutekano, inyemezabwishyu n’amakuru y’abatangabuhamya, ndetse zigatanga amakuru kuri polisi vuba igihe habayeho kwishyura nabi.
Christopher Herrman, impuguke mu by’umutekano, yavuze ko iyo restaurants nyinshi zitanga amakuru ku muntu umwe ukora ibikorwa bisa, bishobora gufasha abashinzwe iperereza kubona ko atari ikibazo cyabaye rimwe gusa.
Ati: “Iyo resitora nyinshi zitanga amakuru ku myitwarire imwe yakozwe n’umuntu umwe, abashinzwe iperereza bashobora kubona ko hari uburyo busubirwamo, aho kubona ko ari igikorwa cyabaye rimwe gusa.”
Britney Cariño, ukuriye restaurant ya Talavera Cantina i Bronx, yashyize ku mbuga nkoranyambaga amashusho ya camera z’umutekano agaragaza abantu batatu bivugwa ko bavuye muri restaurant batishyuye fagitire y’amadolari 112.
Resitora zo muri New York zatangiye gukoresha imbuga nkoranyambaga mu gushyira ahagaragara abantu barya amafunguro bakagenda batishyuye.