Ni mukino wa gatanu w’icyiciro cya nyuma (NBA Finals) wabaye ku wa Gatandatu muri shampiyona ya Basketball ya Leta Zunze Ubumwe za America aho muri uru rukerera rwo kuwa Gatandatu hashyira ku Cyumweru ikoze aya mateka nyuma y'imyaka 53 nta gikombe iheruka.
Ni mu gihe Jalen Brunson wa Knicks, ari we wigaragaje cyane muri uyu mukino atsinda amanota 45, anafasha ikipe ye gusoza uruhererekane rw’imikino irindwi ishoboka (best-of-seven) itsinze Spurs imikino 4-1.
Spurs yatangiye umukino neza nk’uko yari yabigenje mu mikino yabanje, ndetse iza kugira ibihe byinshi yayoboye umukino ifite ikinyuranyo kirenga amanota 10.
Gusa Knicks yakomeje kugaruka buhoro buhoro, kugeza ubwo yafashe ubuyobozi bwa mbere ku mukino habura iminota 3 n’amasegonda 40 ngo urangire.
Nubwo Spurs yagerageje kongera kwishyura amanota, ntiyabashije guhindura ibiri kuba, maze Knicks yegukana igikombe cya NBA nyuma y’imyaka myinshi yo kugitegereza.
Uru rugendo rwa Knicks rwabaye urudasanzwe, kuko yagaragaje imbaraga zikomeye mu mikino ya nyuma ya shampiyona, itsindwa imikino itatu gusa mu mikino yose yakinnye muri playoffs.
Iki gikombe kibaye icya gatatu mu mateka ya Knicks, nyuma y’ibyo yatwaye mu 1970 na 1973, ndetse kikaba cyasubije ibyishimo abafana b’iyi kipe yari imaze igihe kinini itegereje kongera kubona intsinzi ikomeye muri NBA.
New York Knicks yegukanye NBA nyuma y'imyaka 53 itayiheruka