Ikipe ya Rayon Sports ikomeje kwiyubaka yitegura umwaka w’imikino wa 2026/27 ndetse n’imikino ya CAF Confederation Cup, aho kuri uyu wa Gatanu tariki ya 05 Kamena 2026 yatangaje ko yasinyishije myugariro w’iburyo Ndayishimiye Didier amasezerano y’imyaka ibiri.
Ndayishimiye Didier ashobora gukina ku ruhande rw’iburyo mu bwugarizi no hagati mu kibuga afasha abugarira, ibintu bituma aba umukinnyi ushobora gukoreshwa mu myanya itandukanye. Uyu mukinnyi yageze muri Gikundiro nyuma yo gusoza amasezerano yari afitanye na AS Kigali.
Didier yatangiye kugaragaza impano ye akinira Heroes FC hagati ya 2022 na 2023 mbere yo kwerekeza muri AS Kigali mu 2023, aho yamaze imyaka itatu agaragaza urwego rwiza rwatumye yitabwaho n’amakipe atandukanye. Kuri ubu, yahisemo gukomereza urugendo rwe muri Rayon Sports.
Mu rwego rw’amakipe y’Igihugu, Ndayishimiye Didier yagiye yitabazwa mu byiciro bitandukanye birimo Ikipe y’Igihugu y’Abatarengeje imyaka 17 (U17), U20 ndetse anahamagarwa mu ikipe y’Igihugu y’abakina imbere mu gihugu (CHAN Team), ibintu bigaragaza icyizere amaze kugirirwa n’abatoza b’amakipe y’Igihugu.
Mu bigwi bye, Didier azwiho kugira imbaraga mu bwugarizi, gutanga imipira myiza ivuye inyuma, ubushobozi bwo kuzamuka afasha ba rutahizamu no gukina mu myanya myinshi. Ni umwe mu bakinnyi bato bafite ejo hazaza heza muri ruhago y’u Rwanda.
Kwinjira kwa Ndayishimiye Didier muri Rayon Sports ni imwe mu ntambwe zigaragaza ubushake bw’iyi kipe bwo kongera imbaraga mu rwego rwo guhatanira ibikombe imbere mu gihugu no kwitwara neza mu marushanwa Nyafurika.