Amakuru yatangajwe na ESPN avuga ko Trent Jr. yasinyanye amasezerano y'imyaka ine azamuhesha miliyoni 64 z'Amadolari ya Amerika. Aya masezerano yasinywe ku wa Gatandatu, ariko inyandiko ziyemeza zagejejwe muri NBA ku wa Kane, ari na bwo hahise hatangira iperereza.
Gary Trent Jr. w'imyaka 27 yari amaze imyaka ibiri akinira Milwaukee Bucks. Mu mpeshyi ya 2024 yemeye gusinyira iyi kipe ku mushahara muto wemewe muri NBA "league minimum," nyuma yo kuva muri Toronto Raptors.
Mbere y'uko shampiyona ya 2025-2026 itangira ndetse, yongeye gusinya amasezerano y'imyaka ibiri ya miliyoni 7.5 z'Amadolari, aho mu mwaka ushize wa shampiyona yahembwaga miliyoni 3.7 z'Amadolari.
Aya masezerano yahaye Bucks uburenganzira buzwi nka Early Bird Rights, butuma ikipe ishobora kongera gusinyisha umukinnyi wayo n'iyo yaba yararengeje ingano y'umushahara ntarengwa yemerewe.
Nubwo Trent Jr. yatsinze impuzandengo y'amanota 8.1 gusa kuri buri mukino mu mwaka ushize, ari na yo mibare ye yo hasi kuva yatangira gukina muri NBA, yahisemo kutifashisha uburenganzira bwo gukomeza amasezerano yari afite kugira ngo abe umukinnyi wigenga. Biteganyijwe ko mu mwaka wa 2026-2027 azinjiza miliyoni 15.2 z'Amadolari.
Icyatumye NBA itangira iperereza ni ingingo iri mu masezerano agenga shampiyona ibuza amakipe n'abakinnyi kugirana amasezerano rwihishwa mbere y'igihe cyemewe, bizwi nka "prior agreement." Harakekwa ko Milwaukee Bucks ishobora kuba yaragiranye ubwumvikane na Trent Jr. mbere y'uko igihe cyo kuganira ku masezerano kigera.
Abayobozi batandukanye muri NBA bari basanzwe bakeka ko Trent Jr. yakiniraga amafaranga ari munsi y'agaciro ke mu mwaka ushize, ibintu bishobora kuba byaratumye habaho amasezerano yo kuzamwongera umushahara cyane nyuma.
Mu rugendo rwe muri NBA, Gary Trent Jr. yagaragaje urwego rwo hejuru ubwo yakinaga muri Toronto Raptors, aho yabarirwaga impuzandengo y'amanota 18.3 mu mwaka wa 2021-2022 na 17.4 mu wa 2022-2023.
Mu mikino 480 amaze gukina muri NBA, atsindamo impuzandengo y'amanota 13.0 kuri buri mukino ndetse anatsinda amanota atatu ku kigero cya 38.7%.
Yanigaragaje cyane kandi mu mikino ya kamarampaka ya 2024-2025, atsinda impuzandengo y'amanota 18.8 kuri buri mukino, aho yaninjije amanota atatu inshuro 22 muri 44 yagerageje mu mikino itanu yakinnye.