Umukinnyi wahoze akinira Memphis Grizzlies muri NBA, Brandon Clarke, yitabye Imana ku wa 11 Gicurasi 2026, afite imyaka 29, nyuma yo gusangwa nta bwenge afite mu cyumba cya hoteli yari acumbitsemo.
Raporo nshya yatangajwe n’Urwego rushinzwe gusuzuma imfu muri Los Angeles County kuri uyu wa Gatanu, yemeje ko urupfu rwa Clarke rwatewe n’ingaruka zo gukoresha Cocaïne na Heroin, bikaba byaravuyemo kunywa ibiyobyabwenge birenze urugero.
Clarke yasanzwe muri hoteli nta bwenge afite, maze abaganga b’ ubutabazi bamusanze aho, bemeza ko yapfuye. Umwe mu baganga ushinzwe gusuzuma imfu yakoze isuzuma ry’umubiri wa Clarke ku munsi wakurikiyeho, ariko raporo yuzuye y’isuzuma ry’umubiri we ikaba itegerejwe gutangazwa mu minsi iri imbere.
Nk’uko byatangajwe na The Athletic, abashinzwe gusuzuma urupfu rwa Clarke bavuze ko ingaruka z’imiti itandukanye yandikirwa abarwayi na zo zagize uruhare mu kongera uburemere bw’ibyabaye. Urupfu rwe rwabaye nyuma y’ibyumweru bitandatu gusa yari amaze gukurikiranwa n’amategeko muri Arkansas.
Clarke yari yarashinjwe icyaha cyo gukwirakwiza kratom, ikimera gikoreshwa n’abantu bamwe nk’umuti cyangwa ikinyobwa ariko kikaba giteza impaka mu bijyanye n’umutekano wacyo.
Yari kandi yarashinjwe kudahagarara ubwo abapolisi bamutegekaga, ndetse akabacika atwaye imodoka ku muvuduko urenga kilometero 160 ku isaha.
Brandon Clarke yavukiye i Vancouver muri Canada, mbere yo gutoranywa na Oklahoma City Thunder muri Draft ya NBA yo mu 2019. Nyuma yo gutoranywa, yahise yoherezwa muri Memphis Grizzlies, ikipe yakiniye mu gihe cy’imyaka irindwi, harimo n’ibihe bine yagejejeho ikipe muri Playoffs.
Mu mwaka we wa mbere wa NBA wa 2019-2020, Clarke yagaragaje ubushobozi bukomeye, atsinda impuzandengo y’amanota 12.1 n’amanota 5.9 yo gusubira mu gufata imipira (rebounds) kuri buri mukino. Ibyatumye ahabwa umwanya mu bakinnyi beza b’abakinnyi bashya muri NBA.
Mu myaka ye ya nyuma, yatanzwe n'imvune zitandukanye zamubangamiye cyane. kuko muri shampiyona ya 2025-2026, Clarke yakinnye imikino ibiri gusa.
Brandon Clarke wahoze ari umukinnyi wa NBA yapfuye afite imyaka 29