Namaze icyumweru amaso atareba neza! Ibihe bigoye Alyn Sano yanyuzemo mu ikorwa ry’indirimbo na Bensoul - VIDEO

Iyi indirimbo yakozwe mu buryo budasanzwe ndetse ibamo n’inkuru y’akababaro yanyuzwemo na Alyn Sano ubwo bari muri Kenya bafata amashusho yayo.

Yasohotse ku mugaragaro kuri uyu wa Gatanu, tariki 25 Nyakanga 2025. Alyn Sano yabwiye InyaRwanda, uko yafashe urugendo rwo kujya muri Kenya gufata amashusho, ariko bigahinduka urugamba kubera ikibazo yagize cy’amaso.

Ati “Ifatwa ry’amashusho ryabereye i Nairobi muri Kenya, ariko ikintu kidasanzwe cyabaye ni uko nambaye utwuma twambarwa ku maso twitwa “contact Lens” kubera uko inkuru y’indirimbo yari iteye.”

Akomeza agira ati “Twabikoreye ko byajyanaga n’uruhare nari mfite muri video, ariko byarangiye bitumye amaso yanjye abyimba cyane, arandya ku buryo namaze icyumweru ntareba neza. Twageze aho dutekereza ko nahindutse impumyi.”

Inyandiko ziri kuri internet zivuga ko Contact lens ari utwuma duto cyane twambarwa mu maso (ahagana ku mboni) mu rwego rwo gukosora ikibazo cy’ubwonko bwo kureba cyangwa se kugira ngo umuntu agaragare mu isura runaka bijyanye n’uruhare aba afite—nk’uko Alyn Sano yabikoze muri iyi video.

Utu twuma dukunze kuba tugira amabara atandukanye, kandi iyo tudakozwe cyangwa tudakoreshwa neza dushobora gutera uburwayi bw’amaso.

Alyn Sano avuga ko n’ubwo yarwaye, gukunda akazi no kubaha abahanzi bari kumwe ari byo byamuhaye imbaraga zo gukomeza.

Yemeza ko amashusho yafashwe mu gihe gito gishize, nyamara amajwi y’iyi ndirimbo yari amaze hafi imyaka ibiri akorwa. Avuga ati “Indirimbo tuyifite kuva hafi imyaka ibiri ishize ariko amashusho yayo twarayafashe nk’ukwezi gushize.”

Alyn Sano yanatangaje ko gukorana na Bensoul byamusigiye isomo rikomeye: gukora umuziki uvuye ku mutima aho gukora gusa ibyo abantu bashaka cyangwa ibyo isoko risaba.

Yagize ati: “Bensoul namwigiyeho ko atajya akora ibintu kuko ari ubucuruzi gusa. We akora indirimbo zishingiye ku byo yumva. Ibyo byanyigishije ko indirimbo nzajya nkora zose zigomba kuba zishingiye ku byo numva, umutima wanjye ushaka kuvuga, nkabisangiza abantu. Kuko igihe cyose nabikoze gutyo, byarakoze. Rero sinzongera gusubira inyuma ngo njye gukora ibintu ntumva.”

“Chop Chop” ni urugero rw’imikoranire itanga icyizere. Iyi ndirimbo yerekana uburyo impano zituruka mu Rwanda na Kenya zishobora gufatanya zigatanga igihangano gifite ireme.

Alyn Sano yagaragaje ko iri huriro na Bensoul ryamuteye imbaraga zo kuzamura ireme ry’umuziki we, anavuga ko agiye gukomeza gushyira imbere indirimbo ziva ku mutima.

Uyu muhanzikazi witegura kuririmba muri Giants of Africa, avuga ko ibyamubayeho bikubiyemo urugendo rwo gushaka ubunyamwuga, gukomera ku byo wiyemeje, no kwigira ku bandi bahanzi bafite icyerekezo.  

Nambaye utwuma tw’amaso (contact lenses) birangira amaso abyimbye, turikanga ko mpindutse impumyi– Alyn Sano avuga ku byabaye muri Kenya ubwo yafotwaga amashusho ya ‘Chop Chop’

Bensoul yanyigishije gukora umuziki uvuye ku mutima, ntibibe gusa ubucuruzi -Alyn Sano asobanura amasomo akomeye yakuye muri iyi ndirimbo

Muri iyi ndirimbo, Bensoul agaragara acuranga gitari ari kumwe na Alyn Sano bakoranye ku nshuro ya mbere

Alyn Sano avuga ko Chop Chop ari indirimbo yakozwe n’umutima, igahuzwa n’amasomo y’ubuzima bw’umuhanzi nyabyo 

Iyi ndirimbo yakozwe mu myaka ibiri ishize, ibintu Alyn Sano avuga ko ari ubushake n’ubwitange bikomeye mu rugendo rw’umuziki

KANDA HANO UREBE AMASHUSHO Y’INDIRIMBO ‘CHOP CHOP’ YA ALYN SANO NA BENSOUL