Nabaye umwana wirera - Amalon avuga uko kwiyizera no kwifatira icyemezo byamugaruye ku isoko ry’umuziki (VIDEO)

Uyu muhanzi uri mu bagezweho muri iki gihe, yavuze ko imyaka ishize yamaze atagaragara cyane mu muziki atari uko yari yarawuretse, ahubwo ko yari yafashwe n'ibihe byamwigishije ko umuhanzi adakwiye guhora ategereje ko hari undi uza kumufasha kugira ngo atere imbere.

Mu kiganiro yagiranye na InyaRwanda, Amalon yavuze ko nyuma yo gutandukana na sosiyete ya 1K Entertainment yashinzwe na DJ Pius, yinjiye mu rugendo rutari rworoshye rwamusabye kongera kwiga uko yakomeza urugendo rwe nk'umuhanzi wigenga.

Mu myaka isaga itatu ishize, benshi bibazaga impamvu Amalon atakigaragara nk'uko byari bisanzwe. Nta ndirimbo nshya yasohoraga, ibikorwa bye byari byaragabanyutse, ndetse bamwe batangira gukeka ko ashobora kuba yarahagaritse umuziki.

Nyamara we avuga ko icyo gihe atigeze areka gukunda umuziki cyangwa ngo awuhe umurongo. Ahubwo yari ari mu rugendo rwo gushaka uko yakwiyubaka atagitegereje ko hari undi uzabimukorera.

Yifashishije urugero rw'umwana, yavuze ko umuhanzi na we aba akeneye kwitabwaho, gufashwa no kuyoborwa mu ntangiriro z'urugendo rwe. Ariko kandi ngo hari igihe kigera umuntu akamenya ko igihe cyo kwigenga cyageze.

Ati: "Urabona umuhanzi kugira ngo akore cyangwa agire ibyo atanga ni uko abantu babanza kumva ko ameze nk'uruhinja. Aba akeneye kumuguyaguya. Icyo gihe nanjye nkiri muri iyo si yo kuba nkeneye umuntu unyitaho. Ariko hashobora kubura uwo muntu, ibintu bikaguhagararaho."

Ayo magambo ni yo yaje kumuviramo gufata icyemezo gikomeye cyo kwiga "kwirera", ijambo yakoresheje agaragaza uburyo yahinduye imitekerereze ye akava mu kwishingikiriza ku bandi.

Ati: "Icyaje kuba rero ni uko namenye kwirera. Iryo ni ryo tandukaniro. Sinari naragiye kure y'umuziki, ahubwo ako kantu ko kurerwa nagashyize ku ruhande, biba ngombwa ko niga kwirera."

Amalon avuga ko iyo myumvire mishya ari yo yamusubije ku isoko ry'umuziki afite icyizere n'imbaraga zo kwifatira ibyemezo, aho gukomeza gutegereza ko hari uzamukingurira amarembo.

Mu mvugo irimo ubutumwa bukomeye, yavuze ko hari igihe yumvise ko "umurezi" yari yishingikirijeho atakiri kumuha ibyo yari akeneye, bityo afata icyemezo cyo gushaka indi nzira. Ati: "Naravuze nti niba umurezi ari we mubi, reka nshake uburyo nderwa. Ntabwo nigeze mvuga ngo mve mu muziki."

Aya magambo agaragaza ko ikibazo kitari umuziki ubwawo, ahubwo cyari uburyo yakoragamo n'uko yari ateze amaso ubufasha bw'abandi.

Uyu munsi, Amalon ni umwe mu bahanzi bongeye kubaka izina rikomeye mu muziki nyarwanda. Nyuma yo guhitamo gukomeza urugendo nk'umuhanzi wigenga, yashyize hanze indirimbo zakunzwe zirimo 'Nyirabasare', 'Impunzi', 'Ni Imana' n'izindi zatumye yongera kwigarurira imitima y'abakunzi b'umuziki.

Inkuru ya Amalon ntabwo ivuga gusa ku rugendo rw'umuhanzi. Ni inkuru ivuga ku muntu wese wageze igihe akumva abo yari yitezeho batakimufasha, agahitamo kwiyubaka aho kwiheba.

Ni urugendo rw'amasomo agaragaza ko hari igihe gutsinda bitatangira igihe ubonye abagufasha, ahubwo bitangirira igihe wemeye ko ushobora kuba igisubizo cy'ibibazo byawe.

Ku bwa Amalon, "kwirera" ntabwo byabaye iherezo ry'urugendo rwe, ahubwo ni bwo bwabaye intangiriro y'indi ntambwe yamugejeje ku rwego ariho uyu munsi, aho agaragaza ko atagarutse mu muziki agamije kongera kubura, ahubwo yagarutse afite intego yo gukomeza gutera imbere no kubaka umurage we.

Amalon yatangaje ko yahisemo “kwirera” nyuma yo kubona ko ‘Label’ itamuhaga ibyo yari akeneye

Amalon yavuze ko atigeze atekereza kureka umuziki, ahubwo yahisemo gushikama mu rugendo yatangiye

KANDA HANO UREBE IKIGANIRO CYIHARIYE TWAGIRANYE NA AMALON

VIDEO: Dox Visual /InyaRwanda