Muyango, Lionel Sentore, Daniel Ngarukiye na Ikirezi bagiye guhurira mu gitaramo muri Canada

Uruhererekane rw’ibitaramo biteganyijwe mu buryo bwa “World Tour”, bizatangira ku wa 13 Ukuboza 2025 mu gitaramo azakorera mu Mujyi wa Montreal mu gihugu cya Canada.

Azahurria ku rubyiniro n’abahanzi bakomeye barimo nka Muyango Jean Marie wamamaye mu ndirimbo nka ‘Karame Uwangabiye’; Ikirezi, umukobwa wa Massamba Intore uzwi mu ndirimbo nka ‘Rusaro Rubasumba’ ndetse na Daniel Ngarukiye uzwi mu ndirimbo zirimo nka “Bwiza”, “Umwari w’i Rwanda”, “Ikibugenge” n’izindi.

Urugendo rw’ibi bitaramo bya Lionel Sentore bigamije kugeza umuco nyarwanda hirya no hino no kumenyekanisha ibihangano bya Lionel ku rwego rw’isi.

Kananura Didier washinze Kanan Connections akaba n’umujyanama wa Lionel Sentore, yabwiye InyaRwanda ko ibi bitaramo bizagera muri Canada, Leta Zunze Ubumwe za Amerika ndetse no mu karere k'Afurika y'Iburasirazuba.

Yavuze ko muri Canada, igitaramo kizabera i Montreal, aho Lionel afite umubare munini w’abakunzi bakurikirana inganzo ya gakondo.

Leta Zunze Ubumwe z'Amerika, hazibandwa cyane mu mijyi ya Maine na Arizona, aho umuco nyarwanda ukomeje kwiyubaka binyuze mu bitaramo n’ibindi bikorwa by’abahanzi Nyarwanda.

Uru rugendo ruzagera no mu Mujyi wa Kampala muri Uganda, hagamijwe gukomeza gukundisha akarere umuziki nyarwanda w’umwimerere no kongera umubare w’abawukurikira.

Kananura yagize ati “Ibi bitaramo wavuga nka ‘World Tour’ bigamije kumenyekanisha Album ‘Uwangabiye’ mu bihugu Lionel azageramo. Ni n’uburyo bwo gukomeza gukundisha Abanyarwanda n’abanyamahanga umuco gakondo n’ibihangano bye. Amatariki azatangazwa mu minsi iri imbere, ariko byose bizasorezwa i Kigali.”

Lionel Sentore, ubarizwa mu Bubiligi, akomeje kuba umwe mu bahanzi bahagaze neza mu kumurikira amahanga umuziki wa Kinyarwanda. Amajwi ye adasanzwe n’imiririmbire ye yimikije umuco byamugize umwe mu barinda isura y’umuziki gakondo.

Album ye nshya, ‘Uwangabiye’, irimo indirimbo zirimo ubwuzu n’umwimerere, zigaragaza ubuzima bwa kinyarwanda n’imibereho y’abakurambere.

Album ye iriho indirimbo nka: ‘Umukobwa w’abeza’, ‘Teta’, ‘I.U.O.A.E’, ‘Uko bimeze’ yakoranye na Mike Kayihura, ‘Urera’ yakoranye na Elysee, ‘Uwangabiye’ ari na yo yitiriye Album, ‘Hobe’, ‘Mukandori’ yakoranye na Angela, ‘Ntaramanye’, ‘Urukundo’ yakoranye na Boule Mpanya, ‘Yanyuzuye umutima’ ndetse na ‘Haguruka ugende’.

Tariki 27 Nyakanga 2025, Lionel Sentore yakoreye igitaramo gikomeye muri Kigali Conference and Exhibition Village (Camp Kigali), aho yamurikiyemo Album ‘Uwangabiye’ mu buryo bw’amashusho n’amajwi byuzuye ubuhanga.

Ni igitaramo cyarimo abahanzi n’amatorero akomeye barimo Ruti Joel, Jules Sentore ndetse n’Itorero Ishyaka ry’Intore, cyatanze ishusho y’uburyo uru rugendo rwa World Tour ruzaba rufite ireme rinogeye ijisho n’umutima. 

Lionel Sentore agiye gutangira i Montreal muri Canada mu ruhererekane rw’ibitaramo bigamije kumenyekanisha Album ye ‘Uwangabiye’

Umukirigitananga Daniel Ngarukiye agiye kongera gutaramira mu gihugu cya Canada

Ikirezi Deborah wamamaye mu ndirimbo zinyuranye azifatanya na Lionel Sentore mu gitaramo cye

Muyango Jean Marie uherutse gusohora Album “Imbanzamumyambi” agiye gutaramira muri Canada mu gitaramo kizaba tariki ya 13 Ukuboza 2025

KANDA HANO UBASHE KUMVA ALBUM ‘UWANGABIYE’ YA LIONEL SENTORE