Gahunda yo gusubiza mu buzima busanzwe aba banyarwanda bahoze mu mitwe yitwaje intwaro irwanya u Rwanda ikorera muri Repubulika Iharanira Demokarasi ya Congo, yabaye ku wa Kane tariki ya 10 Nzeri 2026, ibera i Mutobo mu Karere ka Musanze, mu Ntara y'Amajyaruguru.
Yitabiriwe n'abayobozi banyuranye barimo Perezida wa Komisiyo y'Igihugu yo Gusezerera no gusubiza mu buzima busanzwe abari ingabo, Hon. Nyirahabineza Valerie; Umuvugizi wa Guverinoma Wungirije, Uwera Jean Maurice; Guverineri w'Intara y'Amajyaruguru, Mugabowagahunde Maurice, n'abandi.
Abasoje iki cyiciro kuri uyu wa 10 Nzeri 2026, barimo 130 bahoze muri FDLR n'imitwe iyishamikiyeho, muri bo 108 ni abagabo abandi 22 ni abagore. Hari kandi abasivili 79 barimo abagabo 46 n'abagore 33 bakoranaga bya hafi n'imitwe yitwaje intwaro.
Usibye abo, harimo n'abandi 207 barimo abakuze 35 n'abana 172 kandi muri abo bana, 143 bagejeje igihe cyo kuba bari mu mashuri y'incuke n'abanza, mu gihe hahise hanatangizwa icyiciro cya 78.
Guverineri w'Intara y'Amajyaruguru, Mugabowagahunde Maurice, yashimiye Leta y'Ubumwe iyobowe na Nyakubahwa Perezida Paul Kagame udahwema gushakira u Rwanda n'abanyarwanda ibyiza birimo umutekano, ubumwe, amahoro n'iterambere, anashimira abo bahisemo gutaha mu rwababyaye ngo batange umusanzu mu kurwubaka.
Yagize ati: "Nyakubahwa Perezida Paul Kagame ahora utubwira ko nta mwana n'umwe w'umunyarwanda ukwiye guhera ishyanga, ko ahubwo buri munyarwanda wese ahamagariwe kuza kwifatanya n'abandi bose kubaka Igihugu kabone n'iyo waba wari muri iyo mitwe yitwaje intwaro irwanya Igihugu."
"Ndashimira abantu bose bumvise uwo muhamagaro bakarambika intwaro hasi bagataha mu rwababyaye kugira ngo batange umusanzu wabo mu kongera kubaka Igihugu."
Umuvugizi wa Guverinoma Wungirije, Uwera Jean Maurice, yibukije abasubijwe mu buzima busanzwe ko bafite umukoro wo kurebera ku bababanjirije bagakora cyane bakiteza imbere kuko bishoboka.
Ati: "Ibyahise ni igice cy'amateka yanyu, ariko si byo bigomba kugena ahazaza hanyu. Uyu munsi mufite amahirwe yo gutangira bundi bushya mugahitamo inzira yo gukoresha imbaraga zanyu mu guteza imbere imiryango yanyu n'igihugu."
Yakomeje agira ati: "Gutangira ubuzima bushya birashoboka kuko hariho n'abandi bababanjirije kandi bafite icyo bamaze kugeraho bakaba banafasha abandi kwiteza imbere. Nta mpungenge mukwiye kugira kuko mufite ubuyobozi buzabaherekeza muri urwo rugendo."
Abasoje amasomo abategurira gusubira mu buzima busanzwe, bemeje ko bagiye guharanira ubumwe bw'abanyarwanda bakarwanya icyagarura amacakubiri ndetse bakarwanya n'ingengabitekerezo ya Jenoside aho yaturuka hose, bashishikariza abakiri mu mashyamba ya DR Congo gutaha kuko ntacyo barwanira.
Srt Niragire Dieumerçi ni umwe muri bo, yagize ati :"Turabwira abakiri mu mashyamba ya DR Congo n'abandi bose bagifite imigambi mibisha yo gutera u Rwanda no kuruhekura, ngo bashyire intwaro hasi batahuke mu mahoro mu Gihugu cyababyaye baze bafatanye n'abandi banyarwanda bubake Igihugu kuko gihora kiteguye kubakira."
Sordat Rukundo Janvier, nawe yagize ati: "Kubera ko twakuriye muri Congo, batubwiraga ko mu Rwanda habamo abanzi bacu ngo nitujya tubona umututsi tujye tumwica dukura gutyo tukajya tubiba ibyabo."
"Twakomeje kujya tuvugana n'abo mu miryango yacu basigaye ino n'ababaga baratorotse mbere bakaduha amakuru ko mu Rwanda nta kibazo. Inyigisho twahawe zizamfasha kubana neza n'abo nsanze niteze imbere nteze n'igihugu imbere. Abakiri mu mashyamba ndabashishikariza gutaha mu Rwanda kuko ni amahoro."
Perezida wa Komisiyo y'Igihugu yo Gusezerera no gusubiza mu buzima busanzwe abari ingabo, Hon. Nyirahabineza Valerie, yashimiye abitandukanyije n'iyo mitwe kuko bahisemo amahoro, kwihesha agaciro kandi ko gusubira mu Gihugu ari amahirwe yo kongera kubaka umubano n’imiryango ndetse n’abaturage kuko nta Gihugu cyaruta icyabo.
Abasubijwe mu buzima busanzwe bagize icyiciro cya 77, biganjemo abo mu Ntara y'Uburengerazuba n'iy'Amajyaruguru, bize amateka y’u Rwanda, Ndi Umunyarwanda, uburere mboneragihugu, Gahunda y’Igihugu yo kwihutisha iterambere icyiciro cya Kabiri (NST2), amakoperative, kubona imari, Mutuelle de Santé, uburezi, kugira uruhare mu kwicungira umutekano, kwihangira imirimo no kurwanya ruswa.
Banahawe ubumenyi ku mategeko mpuzamahanga n’amategeko mbonezamubano ajyanye na Jenoside, ndetse n’akamaro ko gukumira ingengabitekerezo ya Jenoside, ingaruka zo guhakana no gupfobya Jenoside yakorewe Abatutsi mu 1994, n’ibindi bikorwa bishobora kubiba urwango.
Abanyarwanda barenga 200 bahoze mu mitwe yitwaje intwaro basubijwe mu buzima busanzwe
Umwanditsi: Jean Claude Bazatsinda