Ibi Minisitiri
Nduhungirehe yabitangaje ubwo yabazwaga na IGIHE niba ari ukuri ko Perezida w’u
Bufaransa, Emmanuel Macron, yasabye Perezida Paul Kagame gukuramo kandidatire
ya Mushikiwabo, mu rwego rwo gukumira ko RDC iva muri OIF.
Yagize ati: “Icyo navuga
gusa ni uko Louise Mushikiwabo ari mu bahatana.”
Ibi bibaye mu gihe
Perezida wa RDC, Félix Tshisekedi, aherutse gutangaza ko igihugu cye gishobora
kuva muri OIF mu gihe Mushikiwabo yaba atorewe gukomeza kuyobora uyu muryango.
RDC ni cyo gihugu gifite abaturage benshi bavuga Igifaransa ku Isi, bityo kuba
cyavamo bikaba byagira ingaruka zikomeye kuri uyu muryango.
Ikinyamakuru Jeune
Afrique cyatangaje ko Perezida Macron yaba yarandikiye Perezida Kagame mu ijoro
ryo ku wa 12 rishyira ku wa 13 Ugushyingo 2026, amusaba ko u Rwanda rwakuramo
kandidatire ya Mushikiwabo kugira ngo hirindwe ko RDC iva muri OIF.
Muri ubwo butumwa,
bivugwa ko Macron yagaragaje ko Perezida Tshisekedi wa RDC na Mohamed Ould
Ghazouani wa Mauritania na bo bari bemeye gukura mu irushanwa abakandida
b'ibihugu byabo, Juliana Amato Lumumba na Coumba Ba.
Icyo gitekerezo cyari
kigamije guha amahirwe umukandida wumvikanwaho, Dacian Cioloș, wahoze ari
Minisitiri w’Intebe wa Romania.
Amakuru yatangajwe na
Jeune Afrique avuga ko Macron yifuzaga ko itangazo rimenyesha ko Mushikiwabo
akuyemo kandidatire risohoka mbere y’Inama y’Abaminisitiri ya OIF yari
iteganyijwe kubera i Phnom Penh, mu murwa mukuru wa Cambodia, ku wa 14
Ugushyingo.
Nubwo bimeze bityo,
Mushikiwabo yongeye gushimangira ku wa 13 Ugushyingo ko yifuza ko amatora aba
nk’uko ateganyijwe, aho kugaragaza ko afite gahunda yo gukuramo kandidatire ye.
Ku ruhande rw’u
Bufaransa, Umujyanama wa mbere wa Ambasade yabwo mu Rwanda, Adelin Royer,
yavuze ko iki gihugu n’abandi banyamuryango ba OIF bazakora ibishoboka byose
kugira ngo RDC itava muri uyu muryango.
Yabigarutseho ku wa 13
Ugushyingo 2026, mu kiganiro n’abanyamakuru cyari kijyanye n’urubanza
rw’Umunyarwanda Safari Madjaliwa uzatangira kuburanishwa i Paris mu cyumweru
gikurikira.
Yagize ati: “Birumvikana
ko RDC iramutse ivuye muri OIF byaba ari ibintu bibi cyane, kuko ari kimwe mu
bihugu bikomeye bya Francophonie. Tuzagerageza twese kubyirinda. Ariko kugeza
ubu nta ruhande twafashe. Tuzareba ibizaba ku wa Mbere, ubwo hazaba amatora
cyangwa igenwa ry’Umunyamabanga Mukuru.”
Mushikiwabo na we
aherutse kugaragaza ko atumva impamvu RDC yahitamo kuva muri uyu muryango
kubera amatora, avuga ko byamutangaza cyane.
Amatora yo guhitamo kuba Umunyamabanga
Mukuru mushya wa OIF ateganyijwe ku wa Mbere, tariki ya 16 Ugushyingo 2026,
akazaba mu buryo butandukanye n’ubwari busanzwe bukoreshwa.
Ku nshuro ya mbere, buri gihugu kizagira ijwi rimwe mu gutora umukandida gishyigikiye, aho kuba umukandida wumvikanweho n’ibihugu byose nk’uko byari bimaze igihe bikorwa.


Minisitiri w’Ububanyi n’Amahanga w’u Rwanda, Olivier Nduhungirehe, yatangaje ko Louise Mushikiwabo agikomeje kuba umukandida w’u Rwanda mu matora yo kuyobora Umuryango w’Ibihugu bikoresha Igifaransa (OIF)
