Aya mahugurwa y'icyumweru
yatangiye ku wa 2 Ugushyingo, azarangira ku wa 6 Ugushyingo 2026, ari kubera mu
Kigo cy'Igihugu cy'Amahoro, Rwanda Peace Academy (RPA) i Nyakinama mu Karere ka
Musanze.
Agamije kongerera
abayitabiriye, ubumenyi bwo kurengera no kurinda uburenganzira bwa muntu cyane
cyane mu gihe bari mu butumwa bw'amahoro mu bice bitandukanye mu gihe cyose
baba boherejwereyo, ariko n'igihe bataburimo bafite inshingano zo kuburengera
ko gusangira ubunararibonye na bagenzi babo baba bakorana.
Aya mahugurwa yateguwe
n'Ikigo cy'Igihugu cy'Amahoro, Rwanda Peace Academy, ku bufatanye n'Ibiro
by’Umuryango w’Abibumbye bishinzwe Uburenganzira bwa Muntu mu Rwanda, hamwe
n'Ishami ry’Umuryango w’Abibumbye ryita ku Bana (UNICEF).
Bamwe mu bayitabiriye bavuga ko biteze kuhungukira byinshi kandi ko bazayasangiza n'abandi bakorana bagamije kubongerera ubumenyi bwo kurengera uburenganzira bwa muntu mu bikorwa bitandukanye.
Lt Col Marie Chantal
Umuhoza yagize ati "Azadufasha mu kazi kacu ka buri munsi kuko
tuzasobanukirwa birushijeho uko ubwo burenganzira bwubahirizwa mu byiciro
bitandukanye haba aho dukorera no mubo dukorana nabo."
"Ingabo z'u Rwanda
dukora no ku rwego mpuzamahanga aho tujya mu butumwa bw'amahoro tukahahurira
n'ibihugu bitandukanye. Mbere na mbere hari ukubahiriza ubwo burenganzira muri
icyo gihugu tuba twagiyemo ariko noneho no mu bo dukorana. Uko twakoraga tutarayabona
twizeye ko hari ikiziyongeraho."
Umukozi wa Minisiteri y'Ubutabera, Kizito Jean Pierre "Twiteze ko muri aya mahugurwa tuzigiramo amasomo atandukanye azadufasha gukomeza ukubahiriza uburenganzira bwa muntu kandi azadufasha mu buzima bwa buri munsi."
Umujyanama Mukuru mu
by’Uburenganzira bwa Muntu w'Umuhuzabikorwa w’Umuryango w’Abibumbye mu Rwanda,
akaba n’Umuyobozi w’Ibiro by’Umuryango w’Abibumbye bishinzwe Uburenganzira bwa
Muntu mu Rwanda, Michael Ngabirano, yagize ati"Twigisha ababa bitegura
kujya mu butumwa bw'amahoro kandi u Rwanda Igihugu cy'intangarugero mu bikorwa
byo kubungabunga amahoro."
" Iyo turi mu bikorwa byo kubungabunga amahoro haba mu Gihugu no mu mirimo ya buri munsi, abasirikare, abapolisi n'abasivili barakorana cyane, no mu butumwa bw'amahoro naho kugira ngo bagere ku ntego cyane cyane mu kurengera uburenganzira bwa muntu."
Umuyobozi wa Rwanda Peace
Academy, Rtd Col Jill Rutaremara, yasabye abitabiriye aya mahugurwa
kuyakurikira neza ndetse bakazasangiza abandi ubumenyi bazahakura.
Ati " Ku bitabiriye
aya mahugurwa turabasaba kwiga neza bakabifata bakazava hano bafite ubumenyi
bwinshi, ubuhanga n’inararibonye muri uru rwego. Bityo rero, ndabakangurira
kubyaza umusaruro uyu mwanya, bakigira ku bandi kandi bagasangiza abandi ubu
bumenyi."
U Rwanda ruri ku mwanya wa kabiri mu bihugu bitanga ingabo zo kubungabunga amahoro ku Isi. Rukaba ku mwanya wa mbere muri Afurika kuko rufite ingabo zikabakaba 5,000 mu bihugu bitandukanye.