Ejo ku Cyumweru ni bwo ikipe ya Rayon Sports yatsinze Mukura VS ibitego 2-1 mu mukino wo ku munsi wa 21 wa shampiyona y’icyiciro cya mbere mu Rwanda ya 2025/2026. Ni ibitego bya Aziz Bassane ku munota wa 1 na Ramazani Tshimanga ku munota wa 45+1 mu gihe Mukura VS yo yatsindiwe na Joseph Sackey ku munota wa 77.
Nyuma y’umukino, Ikipe ya Mukura VS yagaragaje ukutishimira imisifurire. Umutoza wayo Nshimiyimana Canisius yavuze ko batsinzwe kubera ko habayemo ukuboko k’umusifuzi.
Uyu mutoza yerekanye ko muri uyu mukino wasifuwe n’umusifuzi mpuzamahanga Uwikunda Samuel, hari ikosa ryakorewe Elia Tatou mu rubuga rw’amahina ariko ntihatangwa penariti, hakaba hari umupira Mutsinzi Patrick yahinduye mu rubuga rw’amahina maze Uwumukiza Obed akozaho intoki na bwo ntiharangwa penariti.
Ahandi avuga ko bibwe ni aho Elia Tatou yazamuye koroneri, Boateng Mensah ashyiraho umutwe maze umupira ujya mu izamu, gusa umusifuzi asifura ko habayemo amakosa kandi atari byo.
Kuri ubu iyi kipe igiye kuregera Ishyirahamwe ry’umupira w’amaguru mu Rwanda, FERWAFA, isaba ko yarenganurwa nk'uko umwe mu bayobozi bayo yabitangarije InyaRwanda. Ni ku nshuro ya 6 iyi kipe igiye kuregera FERWAFA kubera kutishimira imisifurire muri uyu mwaka w’imikino.
Byabaye ku mukino na APR FC, AS Muhanga, Bugesera FC, Marine FC na Kiyovu Sports.
Kugeza ubu Mukura VS iri ku mwanya wa 8 ku rutonde rwa shampiyona n’amanota 31.
Mukura VS igiye kuregera FERWAFA ku nshuro ya 6 kubera abasifuzi