Ibi Yannick yabitangaje abinyujije ku rukuta rwe rwa Instagram. Yashimiye buri umwe muri Sandvikens IF avuga ko bamwakiriye neza kuva ayigezemo muri 2019 ndetse ko bitoroshye kuri we gusezera.
Ati: ”Ndifuza gufata uyu mwanya ngo nshimire cyane buri wese muri iyi kipe. Kuva nje mu 2019, mwanyakiriye neza, mwanyizereyemo kandi uru rugendo ntabwo ruzibagirana.
Ntabwo byoroshye kuri njye gusezera, kuko mu myaka yashize Sandvikens IF yabaye umuryango kuri njye. Urwibutso, imbaraga, n'umubano twubatse hano bizahora biri mu mutima wanjye.”
Yashimiye abayobozi, abatoza, abakinnyi n’abafana urukundo bamweretse ndetse avuga ko yifuriza iyi kipe intsinzi. Ati: ”Ku bayobozi, abatoza, abakinnyi bagenzi banjye, abafana, n'abandi bose bagize uyu muryango, ndabashimira urukundo, icyizere, n'ibihe bitangaje twasangiye. Uko ntera intambwe ikurikira mu mwuga wanjye, njyana byose nize n'ibyo nanyuzemo hano. Ndifuriza ikipe intsinzi gusa”.
Mukunzi Yannick yavuze ko intambwe ikurikira iri kuza. Uyu mukinnyi ukina mu kibuga hagati afasha gusatira, amasezerano ye yari yararangiye nyuma y'imyaka itanu mu ikipe ya Sandvikens IF dore ko yari yarayigezemo muri 2019 iri mu Cyiciro cya Gatatu mu 2019 ariko ubu ikaba iri mu cya kabiri.
Mukunzi Yannick uheruka gukiruka imvune yari amaranye igihe kinini yazamukiye mu irerero rya APR FC ndetse aza no gukinira ikipe nkuru mbere yo kwerekeza muri Rayon Sports nayo ayikinira imyaka 2 mbere yo kwerekeza muri Sweden.
Mukunzi Yannick yatandukanye na Sandvikens IF nyuma y'imyaka itandatu
