Mu maso y’umuherwe mushya wa Chelsea Todd Boehly, Tuchel n’abasore be bananiwe kwikura imbere ya Wolves

Wari umukino wa mbere umuherwe Todd Boehly yari akurikiye nyuma yo gutangazwa ko ariwe ugiye gusimbura Abramovich muri Chelsea ndetse akaba yiyemeje kubaka ikipe itinyitse muri byose ku Isi.

Nubwo Tuchel n’abasore be bifuzaga kwakirana uyu mukire [Todd Boehly] itsinzi ku kibuga Stamford Bridge, ntabwo bigeze boroherwa na Wolves kuko bakoze ibishoboka byose ariko umukino ukarangira baguye miswi ibitego 2-2.

Ibitego bya Chelsea byabonetse mu minota yegeranye cyane bitsinzwe na Romelu Lukaku watsinze penaliti ku munota wa 56, atsinda igitego cya kabiri ku munota wa 58, mu gihe Teinčao yishyuye igitego ku munota wa 79, Coady atsinda igitego mu minota yari yongewe kuri 90, umukino uhita unarangira.

Chelsea yujuje imikino 5 yikurikiranya yitwara nab muri Premier League, aho yatsinze umukino umwe, inganya ibiri inatsindwa indi mikino ibiri.

Kunganya uyu mukino byatumye Chelsea yishyira ku gitutu cyo gukurwa ku mwanya wa gatatu iriho, kuko magingo aya irusha amanota 4 Arsenal iyikurikiye ariko Arsenal ikagira imikino ibiri y’ibirarane, nubwo nayo ifite umukino w’ikirarane, ikanarusha Tottenham amanota atandatu.

Irindi kosa Chelsea yakora mu gihe Arsenal yatsinze imikino yayo, yakwisanga yavuye ku mwanya wa gatatu yicayeho magingo aya muri Premier League.

Nyuma y’imikino 35 imaze gukina muri shampiyona y’u Bwongereza, Chelsea iri ku mwanya wa gatatu n’amanota 67, igakurikirwa na Arsenal ifite amanota 63 ariko igifite imikino ibiri y’ibirarane.

Umuherwe mushya wa Chelsea Todd Boehly yari yitabiriye umukino we wa mbere kuri Stamford Bridge

Lukaku yatsindiye Chelsea ibitego bibiri muri uyu mukino

Chelsea yatunguwe mu gihe yari yamaze kwizera ko yabonye intsinzi

Wolves yishyuye igitego ku munota wa nyuma