Gonzalo HiguaÃn wavutse kuya 10/12/1987, kugeza ubu yari ari gukinira ikipe yitwa Inter Miami yo muri Leta Zunze Ubumwe za Amerika. Ejo kuwa Mbere ni bwo yatangaje ko namara gukina imikino ibiri isigaye y’ikipe ye ya Inter Miami azahita amanika inkweto akaba asezeye ku mupira burundu.
Mu marira menshi yagize ati: “Umupira w’amaguru wampaye byinshi, nyuma y'umwuga mwiza cyane nagize, ndumva igihe kigeze. Ndashimira cyane byimazeyo abanyeretse urukundo, igihe kirageze cyo gusezera."
Higuain yahereye mu ikipe yabato yo muri sipanye yitwa Liver plate muri 2005 ariko nyuma ahita azamurwa mu bakuru aho mu mikino 41 gusa yatsinzemo ibitego 15. Ibi bitego yatsinze byamubereye ikiraro cyo gutuma muri 2006 yerekeza muri Real Madrid aguzwe miliyoni 16 z'amapawundi.
Nyuma yagiye yitwara neza muri Real Madrid kuko yakinnye imikino 264 atsinda ibitego 121 mu marushanwa yose. Uyu mukinnyi yatwaranye na Real Madrid ibikombe bitatu bya shampiyona ndetse n’igikombe kimwe cy’umwami. Yanakoze agashya ko gutsinda igitego mu masegonda 57 gusa yinjiye mu kibuga asimbuye, hari mu 2007. Umwaka w’imikino yatsinzemo ibitego byinshi ni 2009-2010 kuko yatsinzemo ibitego 27.
Nyuma y'imyaka irindwi y’imikino Gonzalo Higuain akinira Real Madrid mu mpeshyi ya 2013, yifujwe n'amakipe abiri ariyo Arsenal na Napoli ariko birangira Napoli ihigitse Arsenal kuko kuwa 27/07/2013 ari bwo Napoli yaguze rurangiranwa Gonzalo Higuain imuguze miliyoni 53 z'amapawundi.
No muri Napoli uyu mukinnyi yakomeje kwitwara neza kuko mu myaka itatu yahamaze yatsinzemo ibitego 91 mu mikino 146 yakinnye yose hamwe. Mu mwaka w’imikino wa 2015-20016 yabaye umukinnyi watsinze ibitego byinshi muri shampiyona y’ubutariyani kuko yatsinze ibitego 36.
Mu mpeshyi ya 2016 ni bwo yakoze amateka yo kuba umukinnyi uguzwe amafaranga menshi ukomoka muri Amerika y’Amagepfo kuko Juventus yari imutanzeho angana na miliyoni 90 z'amapowundi. Icyakora aka gahigo, Neymar yahise agakuraho yerekeza muri Paris Saint-Germain.
Uyu mukinnyi ntabwo yahiriwe muri Juventus kuko yaje gutizwa muri Ac Milan naho akahava atizwa muri Chelsea. Nyuma yo kuva muri Chelsea, mu 2019 yagarutse muri Juventus banatwarana igikombe cya gatatu cya shampiyona y’u Butaliyani. Mu gihe cyose yamaze muri iyi kipe yabatsindiye ibitego 48 mu mikino 105.
Bidatinze mu mwaka wa 2020 uyu mukinnyi yahisemo kujya gukina muri Leta Zunze Ubumwe za Amerika mu ikipe ya Inter Miami. Yari amaze kuyitsindira ibitego 27 ndetse aanga impira ivamo ibitego 14 mu mikino 65 yari amaze gukina.
Mu ikipe y’igihugu ya Arijantine (Argentina) mu mikino 75 yayikiniye, yatsizemo ibitego 31 kandi yanageze ku mukino wa nyuma w’igikombe cy’isi mu 2014. Muri Copa America, yageze ku mikino 2 ya nyuma ari kumwe na Arijantine muri 2015 na 2016.
Muri rusange uyu mukinnyi yari amaze gutsinda ibitego birenga 300. Ubwo ni ugutegereza tukareba niba mu mikino ibiri asigaje gukinira Inter Miami ashobora kuzatsinda ibindi bitego bityo bikaba byakwiyongera.
