Iki gitaramo cyabereye muri Camp Kigali ku wa Gatandatu tariki ya 25 Nyakanga 2026 kuva saa Kumi n'Ebyiri z'umugoroba. Cyaranzwe n'ibihe byo kuririmba, kubyina, kurira kubera gukorwa ku mutima, gushima Imana no kuyitura ibyifuzo bitandukanye.
Igitaramo cyitabiriwe n'amazina akomeye muri Gospel barimo Rev. Isaie Ndayizeye, Pastor Julienne K. Kabanda, Bishop Prof. Masengo Fidele, Pastor Flory, n'abaramyi Papi Clever na Dorcas, Aime Uwimana, Gaby Kamanzi, Eli Bahati, Bosco Nshuti na Josh Ishimwe.
Cyari ku rwego mpuzamahanga dore ko umuziki wacuranzwe wari ku rwego ruhambaye ndetse n'abaramyi benshi bacyiririmbyemo ari abo hanze y'u Rwanda ari bo Zoravo wo muri Tanzania, Bella Kombo wo muri Tanzania ndetse na Ebuka Songs wo muri Nigeria.
René na Tracy berekanye urwego bagezeho mu muziki wo kuramya Imana
René na Tracy, ari na bo bari bateguye iki gitaramo, berekanye impano yabo binyuze mu ndirimbo zitandukanye zimaze kubakundisha benshi. Baririmbye indirimbo zirimo "Imirimo Yawe", n'izindi zakunzwe cyane, aho buri ndirimbo yakirwaga n'amashyi menshi, amabendera mu bicu ndetse n'abari bitabiriye bakaziririmbana na bo ijambo ku rindi.
Aba bahanzi banamuritse bwa mbere indirimbo yabo nshya "Ni ryo Banga Ngendana", yakiriwe neza n'abitabiriye igitaramo, bagaragaza ko ubutumwa buyikubiyemo bwakoze ku mitima ya benshi. Banifatanyije na Zoravo mu kuririmba indirimbo bahuriyemo "Hello Generation", ibintu byarushijeho kuzamura ibyishimo mu bari aho.
Ben na Chance basubije benshi mu mwuka wo guhimbaza Imana
Itsinda rya Ben na Chance na ryo ryatanze umusanzu ukomeye muri iki gitaramo. Baririmbye zimwe mu ndirimbo zabo zakunzwe cyane zirimo "Igikombe Cyanjye" na "Zaburi Yanjye", indirimbo zatumye benshi bazamura amajwi yabo mu guhimbaza Imana.
Mu gihe aba bahanzi bari ku rubyiniro, humvikanaga amajwi y'abitabiriye baririmbana na bo, bigaragaza uburyo izi ndirimbo za bo zimaze kuba igice cy'ubuzima bw'abakunda umuziki wo kuramya no guhimbaza Imana mu Rwanda.
Bella Kombo yashimangiye impamvu ari umwe mu bahanzi bakunzwe
Umuhanzi w'icyamamare Bella Kombo wo muri Tanzania na we yashimishije cyane abari bitabiriye iki gitaramo. Yaririmbye indirimbo ze zakunzwe zirimo "Umeniona" ndetse n'izindi zafashije benshi kwinjira mu bihe byimbitse byo kuramya Imana.
Bella Kombo kandi yifatanyije na Zoravo ku rubyiniro, bakorana umurimo wo kuramya Imana mu buryo bwashimishije benshi, bituma igitaramo kirushaho kuba cy'amahanga kandi cyuzuyemo ubufatanye hagati y'abaramyi bo mu bihugu bitandukanye.
Zoravo yasize ubutumwa bukomeye binyuze mu ndirimbo ze
Zoravo na we yagaragaje ubuhanga bwe mu muziki wo kuramya no guhimbaza Imana. Usibye kuririmba indirimbo "Hello Generation" ari kumwe na René na Tracy, yanaririmbye izindi ndirimbo ze zakunzwe, aho yibanze ku butumwa bwo gukomeza urubyiruko n'abakirisitu muri rusange gukomeza urugendo rwo kwizera.
Uburyo yagezaga ubutumwa ku bitabiriye n'imikoranire ye n'abandi bahanzi byatumye aba umwe mu bagejeje igitaramo ku rundi rwego.
Ebuka Songs yahinduye igitaramo ibihe by'umudendezo n'ibyishimo
Umuhanzi w'Umunya-Nigeria Ebuka Songs ni umwe mu bakoze ku mitima ya benshi muri iki gitaramo. Akigera ku rubyiniro, yahise ahindura isura y'igitaramo, akura abantu mu myanya yabo, batangira kubyina, kuririmba no guhimbaza Imana n'ibyishimo byinshi.
Mu ndirimbo zitandukanye yaririmbye zirimo “Calling My Name,” “I will pray” n’izindi, zatanze ibihe byo gufungura imitima, gusuka amarangamutima imbere y'Imana, kubohoka, gushima ndetse no kuyitura ibyifuzo bitandukanye.
Benshi bagaragaraga baramya Imana bafite amarira, abandi bazamuye ibiganza mu isengesho, mu gihe abandi babyinaga bishimira ubuntu bwayo.
Abitabiriye iki gitaramo baganiriye ni InyaRwanda, bavuze ko ibihe bagiriye muri iki gitaramo bibafunguriye imiryango y'imigisha, ndetse bibahaye amahoro n'ibyiringiro bishya ku buzima bwabo binyuze muri uwo mwanya wo kuramya.
Banasabye ko ibitaramo nk'ibi byakomeza gutegurwa kuko bifasha kongera gukomera mu kwizera no kubaka ubumwe binyuze mu kuramya no guhimbaza Imana.
Igitaramo cyasigiye benshi inyigisho n'ibyiringiro bishya
In Christ Now ntiyabaye igitaramo cyo gususurutsa abantu gusa, ahubwo yabaye umwanya wo kwegera Imana no kongera imbaraga z'abakristo. Indirimbo, ubutumwa ijambo ry’Imana ndetse n'ubuhamya byaranze iri joro byasize benshi bafite ibyiringiro bishya, biyemeza gukomeza urugendo rwabo rwo kwizera.
Ubufatanye bw'abahanzi bo mu Rwanda n'abo hanze y'igihugu na bwo bwongeye kugaragaza ko umuziki wo kuramya no guhimbaza ukomeje kuba igikoresho gikomeye cyo kwamamaza ubutumwa bwiza no guhuza abantu mu kuramya Imana.
Mu gusoza igitaramo, René na Tracy bashimiye byimazeyo Imana yabashoboje gutegura no kugisohoza neza, banashimira buri wese wagize uruhare mu gutuma In Christ Now iba igikorwa cy'amateka.
Bashimiye abahanzi bose bitabiriye, abafatanyabikorwa ndetse n'imbaga y'abakunzi b'umuziki wo kuramya no guhimbaza bitabiriye ari benshi. Banashimiye kandi Honor Events yabafashije gutegura iki gitaramo banasaba abandi bahanzi gukorana nayo bagendeye ku bunyamwuga n'ubunyangamugayo bwayo.
René na Tracy bagaragaje ko ari abahanzi mpuzamahanga
Kenneth yaririmbye muri iki gitaramo anashimirwa umusanzu yatanze wo kwigisha Tracy byinshi ku muziki
Rev. Isaie Ndayizeye na Pastor Julienne Kabanda basengeye René na Tracy babasabira kugera kure mu muziki wabo
Ben na Chance nabo banyeganyeje Camp Kigali mu gitaramo "In Christ Now"
René na Tracy bamaze amasaha hafi atatu ku ruhimbi batambira Imana ntaguhagarara, ibintu byafashije benshi kwegera intebe y'Imana
Bella Kombo wo muri Tanzania yabanje kuvuga Ikinyarwanda ubwo yari ageze ku ruhimbi, ahembura abantu ibihumbi bitabiriye
Tracy Agasaro aramukanya n'umubyeyi we wari witabiriye iki gitaramo "In Christ Now"
Zoravo wo muri Tanzania yeretswe urukundo rwinshi mu gitaramo "In Christ Now"
Ebuka Songs utaramiye mu Rwanda mu bitaramo bibiri mu kwezi kumwe, yahembuye abitabiriye "In Christ Now"
Ibyishimo n'amarangamutima byaranze igitaramo cya René na Tracy ubwo bamurikaga indirimbo yabo nshya
René na Tracy bamurikiye bwa mbere abakunzi babo indirimbo nshya 'Ni ryo Banga Ngendana' muri In Christ Now
René na Tracy bakoze igitaramo mpuzamahanga bose "In Christ Now Worship Experience"
Ben na Chance beretswe urukundo rwinshi muri "In Christ Now" ya René na Tracy
Bella Kombo wo muri Tanzania yashyigikiye René na Tracy mu gitaramo bise "In Christ Now"
Guhembuka, komatana n'Imana mu byaranze igitaramo mpuzamahanga "In Christ Now" cya René na Tracy
René na Tracy bakoze igitaramo gikomeye banatangaza ko buri mwaka mu cyumweru cya nyuma cya Nyakanga bazajya bakora igitaramo "In Christ Now"
René na Tracy bashimiye buri wese wagize uruhare mu migendekere myiza y'igitaramo cyabo "In Christ Now 2026"
REBA INDIRIMBO "JEHOVAH" IRI MU ZIZIHIYE BENSHI MURI IN CHRIST NOW
AMAFOTO: David Christel & TvO