Inyungu iyi sosiyete y’Itumanaho ya mbere mu Rwanda
yabonye nyuma yo gukuramo imisoro na yo yazamutse ku kigero cya 466.6%, igera
kuri miliyari 8.3 Frw.
Iyi mikorere myiza yagaragaye mu nzego zose za MTN
Rwanda zirimo izijyanye no guhamagara, interineti n’ikorwa rya serivisi za Mobile Money, ibintu
iki kigo kivuga ko byatewe n’imikorere ihamye ndetse n’amategeko n’imiyoborere
bikomeje gushyigikira ishoramari n’udushya mu bukungu bushingiye ku
ikoranabuhanga mu Rwanda.
Umubare w’abakiliya ba MTN Rwanda wakomeje kuzamuka,
ugera kuri miliyoni 8.4 nyuma yo kwiyongeraho 10.6%. Abakoresha internet bageze
kuri miliyoni 2.7 biyongereyeho 19.6%, mu gihe abakoresha Mobile Money nibura
rimwe mu kwezi bageze kuri miliyoni 6.3, bivuze izamuka rya 20.5%.
Ubwiyongere bw’abakoresha izi serivisi zose bugaragaza
uburyo MTN Rwanda ikomeje kwagura ibikorwa byayo mu itumanaho no mu
ikoranabuhanga ry’imari, ndetse n’icyizere ikomeje kugirirwa ku isoko ry’u
Rwanda.
Amafaranga ava kuri interineti yiyongereyeho 10.7%,
ahanini bitewe n’ubwiyongere bwa 64.7% mu ikoreshwa rya inteirneti, gukomeza
kwimukira ku muyoboro wa 4G no kwiyongera kw’abakoresha smartphones bageze kuri
44.9%.
Serivisi zo guhamagara na zo zongeye kwinjiriza MTN
Rwanda amafaranga menshi, aho ziyongereyeho 8.2%. Ibi byafashijwe no kongera
gushyiraho ibiciro bya “mobile termination rates”, icyemezo cyafashije kugarura
uburinganire mu mikoranire hagati y’ibigo by’itumanaho.
Umuyobozi Mukuru wa MTN Rwanda, Monzer Ali yavuze ko
uburyo u Rwanda rushyiraho amategeko n’imiyoborere bifasha cyane ibigo bikora
mu ikoranabuhanga gutera imbere no gushora imari mu buryo burambye.
Yagize ati: “Imiyoborere n’amategeko by’u Rwanda ni
amahirwe akomeye ku gihugu ndetse no ku bigo nka MTN Rwanda. Kuba hari umurongo
usobanutse ugamije kugeza serivisi z’ikoranabuhanga kuri buri Munyarwanda
bituma dufata ibyemezo by’ishoramari twizeye ejo hazaza.”
Yakomeje avuga ko ibyo byafashije MTN Rwanda
kwibanda ku guhanga udushya, gutanga serivisi nziza no gukomeza gutanga
umuyoboro wizewe, ari na byo byagaragaye muri ibi bisubizo byiza.
MTN Rwanda yatangaje kandi ko inyungu mbere yo
gukuramo inyungu ku nguzanyo, imisoro n’ibindi (EBITDA) yazamutseho 32.8% igera
kuri miliyari 34 Frw, mu gihe inyungu ku bikorwa byayo yazamutseho amanota 3.5%
igera kuri 41.5%.
Muri iki gihembwe, sosiyete yashoye miliyari 11.2
Frw mu bikorwa byo kwagura no kunoza umuyoboro wayo hagamijwe kongera
ubuziranenge bwa serivisi no kugera henshi mu gihugu.
Serivisi za Mobile Money zakomeje kuba inkingi ya
mwamba mu kwinjiriza MTN Rwanda amafaranga, aho zinjije 52.7% by’amafaranga
yose yinjijwe n’isosiyete. Amafaranga ava muri uru rwego yiyongereyeho 30.2%.
Uku kuzamuka kwatewe n’ubwiyongere bw’abakoresha
serivisi z’imari zigezweho ndetse no gukomeza kwagura urusobe rwa Mobile Money.
Kugeza ubu, abakoresha Mobile Money bangana na 75.2% by’abakiliya bose ba MTN
Rwanda.
Ibikorwa bikorerwa kuri uru rubuga na byo
byiyongereyeho 30.5% muri iki gihembwe, ibintu MTN Rwanda ivuga ko bigaragaza
uburyo Abanyarwanda n’abacuruzi bagenda bahitamo uburyo bwo kwishyura
hakoreshejwe ikoranabuhanga kuko buborohera kandi bukabafasha mu buzima bwa
buri munsi.
Abakoresha MoMoPay barenga miliyoni 4, ibintu MTN
ivuga ko bigaragaza ko Mobile Money iri kugenda iba umufatanyabikorwa nyakuri
mu bijyanye n’imari ku Banyarwanda.
Muri iki gihembwe kandi, Mobile Money Rwanda Limited
yatangije serivisi nshya y’inguzanyo yiswe “MoFlex” ku bufatanye na Ecobank
Rwanda Plc na Yabx, hagamijwe korohereza abantu ku giti cyabo ndetse n’ibigo
kubona inguzanyo no gukomeza guteza imbere serivisi z’imari ku Banyarwanda
benshi.
Umuyobozi Mukuru wa Mobile Money Rwanda, Chantal U
Kagame yavuze ko icyizere abakiliya bagirira MoMo ari cyo gikomeje gutuma
ibikorwa byayo byaguka.
Yagize ati: “Uretse kwishyurana, turi gukomeza
korohereza Abanyarwanda kubona serivisi z’imari, gufasha ubucuruzi no gutanga
ibisubizo bifasha buri wese. MoFlex ni urugero rwiza rw’icyo dushaka kugeraho.”
Yakomeje avuga ko uburyo u Rwanda rushyigikira
udushya mu rwego rwa fintech butuma bakomeza gutekereza ku bisubizo bishya
bigamije guteza imbere ubwisungane mu by’imari.
Mu rwego rwo gushyigikira gahunda y’u Rwanda yo
guteza imbere ikoranabuhanga, MTN Rwanda yasinyanye amasezerano y’imikoranire
na Minisiteri y’Uburezi agamije kureba uburyo ibisubizo by’ikoranabuhanga
byafasha guteza imbere urwego rw’uburezi.
Binyuze muri ayo masezerano, hatangijwe urubuga rwa
“Digital Skills for Digital Jobs” ruri muri MTN Skills Academy, ruzajya rutanga
amasomo arenga 500 ku buntu ajyanye n’ubumenyi mu ikoranabuhanga, isesengura
ry’amakuru n’ubushobozi mu bijyanye n’imari.
MTN Rwanda yavuze ko yinjiye mu gice gisigaye cya 2026 ifite icyizere n’imbaraga zo gukomeza kongera abakiliya n’amafaranga yinjiza, kwagura serivisi za Mobile Money no gukomeza gucunga neza amafaranga ikoreshwa mu bikorwa byayo, mu rwego rwo gukomeza kugira uruhare mu iterambere ry’u Rwanda rishingiye ku ikoranabuhanga.
MTN Rwanda yungutse Miliyari 8.3 Frw mu gihembwe cya mbere cya 2026