Ku wa Kabiri w'iki Cyumweru nibwo Mukura VS yari yakiriye Rayon Sports mu mukino ubanza wa 1/2 cy'Igikombe cy'Amahoro kuri Stade mpuzamahanga ya Huye. Uyu mukino wahagaze ku munota wa 27 utarangiye bitewe n'ikibazo cy'amatara yatangaga urumuri ruke.
Raporo yuko ikibazo cyagenze yagejejwe muri Komisiyo ishinzwe gutegura amarushanwa muri FERWAFA, isuzuma ibyabaye isanga kuzima kw’amatara byaraturutse ku mpamvu idasanzwe kandi idateganyijwe. Iyi komisiyo kandi yemeje ko nta burangare bwagaragaye kuri Mukura VS yari yakiriye uyu mukino, ndetse ko yakoze ibishoboka byose ngo irinde ko ikibazo nk’iki kibaho.
Bityo, hafashwe umwanzuro ko uyu mukino uzasubirwamo ku wa 22 Mata 2025, saa cyenda z’amanywa, ukabera kuri Stade Mpuzamahanga ya Huye nk’uko byari bisanzwe. Uzakomereza ku munota wari wagezweho mbere y’uko uhagarikwa.
Nyuma y'uyu mwanzuro Rayon Sports yahise yandikira FERWAFA ibaruwa ndende ijurira. Muri iyi baruwa iyi kipe yavuze ko ibyabaye ari uburangare bwa Mukura VS yari yakiriye umukino.
Iyi kipe yavuze ko itemera icyemezo cya Komisiyo ishinzwe amarushanwa ndetse ko Kinyuranye n’amategeko ya FERWAFA, CAF na FIFA ashyira inshingano ku makipe yakiriye umukino mu gihe habaye uburangare butari force majeure/ Act of God.
Rayon Sports yasabye ko hashyirwa mu bikorwa ingingo ya 38.3 y'amategeko agenga amarushanwa ya FERWAFA, igahabwa intsinzi ku bitego 3-0 (mpaga).Yavuze ko mu gihe aya mategeko agenga amarushanwa yaba adakurikijwe Rayon Sport FC ititeguye gukomeza irushanwa ry’ Igikombe cy’ Amahoro (2024-2025).
Rayon Sports yavuze ko kandi yiteguye gutanga ibisobanuro, ibimenyetso byisumbuye ndetse no kuzakomeza gushaka ubutabera bunogeye ku zindi nzego zirebwa no gukemura amakimbirambirane mu mupira w’amaguru.
Ubwo Rayon Sports yaherukaga guhurira na FERWAFA mu kibazo kijya gusa nk'iki byarangiye gute?
Mu gikombe cy'Amahoro cya 2023 nabwo Rayon Sports yagiranye ikibazo na FERWAFA. Icyo gihe hari umukino wo kwishyura wa 1/8 cy'Igikombe cy'Amahoro wagombaga kuyihuza na Intare FC.
Uyu mukino wari uteganyijwe tariki ya 08 Werurwe ariko FERWAFA iratungurana ihita iwimura iwushyira taliki 10 Werurwe bituma Rayon Sports ifata umwanzuro wo kwikura mu irushanwa bitewe nibyo yitaga akavuyo kari mu mitegurire y'irushanwa.
Rayon Sports nyuma yahise yongera yisubiraho igaruka mu irushanwa taliki 10 Werurwe bitewe n'ibiganiro bari bagiranye na FERWAFA,nubwo Murera yagarutse mu irushanwa ariko ntabwo umukino wigeze uba.
Aha niho Intare FC zatangiriye ikirego cyazo zivuga ko Rayon Sports igomba guterwa mpaga bitewe nuko barenze ku mategeko agenga igikombe cy'Amahoro bakikura mu irushanwa. Ishyirahamwe ry'umupira w'amaguru mu Rwanda (FERWAFA) ntabwo ryigeze riha agaciro ikirego cya Intare FC kuko ryahise ritangaza ko umukino washyizwe kuwa Mbere tariki ya 27 Werurwe 2023 saa cyenda kuri stade ya Bugesera.
Aha Intare FC zavuze ko zitajya gukina bituma FERWAFA yongera kuvuga ko umukino wimuwe,guhera icyo gihe amakipe yombi yatangiye kwitaba kuri FERWAFA buri kipe yerekana ingingo iyirengera. Muri iki gihe abayobozi ba Intare FC bo bavuga ko batazigera bakina na Rayon Sports ahubwo ko bo bazakina na Police FC muri 1/4.
Tariki 04 zukwezi kwa 04 nibwo FERWAFA yatangaje ko umwanzuro wafashwe na komisiyo ishinzwe amarushanwa utegeze uhinduka ko umukino ugomba kuba tariki 19 zukwezi kwa 04 gusa Intare FC zanga kugera ku kibuga ziterwa mpaga.
Rayon Sports yongeye guhurira muri 'duel' na FERWAFA
Rayon Sports yavuze ko mu gihe Mukura VS itaterwa mpaga ititeguye gukomeza irushanwa ry'igikombe cy'Amahoro