Miss Vanessa yifatiye ku gahanga abagabo abita inyamaswa zikwiye kurindwa abana b’abakobwa

Uyu mubyeyi uheruka kwibaruka, yifashishije Instagram ye avuga ko abagabo ari abantu babi cyane kandi ko umukobwa akwiye kurindwa iyi Si mu gihe cyose ikirimo abagabo.

Agaragaza ko abagore ari abantu beza kandi ko batandukanye kure n’abagabo kandi ko abagore bakwiye kuva hasi bose kuko hari ushobora gutekereza ko bitaba ku mwana we nyamara bikarangira bimubayeho.

Ubwo butumwa yanditse bugira buti: “Niba ufite umukobwa muri iyi si irimo ibibazo byinshi, ikintu cy’ingenzi ushobora gukora kugira ngo umurinde muri iki gihe ni ukumwigisha hakiri kare uburyo bwo kwirwanaho. Bashyire mu myitozo yo kwirwanaho (martial arts), mu buryo bwose bushoboka.

Isi irimo abagabo ifite ibyago byinshi. Ni yo mpamvu dukwiye kwigisha abakobwa bacu uburyo bwo kwirinda no kwirwanaho imbere y’izo nyamaswa. Nta muntu ujya atekereza ko byabaho ku mwana we kugeza igihe bibaye.

Umukobwa ntiyabona umutekano wuzuye ari kumwe n’umugabo, yaba ari umuvandimwe we, se, marume, mubyara we, inshuti y’umuryango, n’abandi batandukanye. Umugabo ni umugabo, kandi hari itandukaniro riri hagati yabo n’abagore.

Umunsi umugore azasobanukirwa neza ibi, ni wo munsi azabasha kurinda neza abakobwa be. Ni yo mpamvu kwiga kwirwanaho ari ingenzi cyane! Reka twigishe abakobwa bacu uburyo bakwiye kuba babi cyane kurusha abagabo.”

Mbere y’uko yandika ubwo butumwa, yari yabaje gusangiza (share) abamukurikirana ubundi butumwa bw’abagabo bagiye bahemukira abagore. Avuga ati: “Sinanga abagabo ariko…”

Miss Vanessa yashyize hanze ubutumwa burebure busaba ko abana b'abakobwa batozwa kwirinda hakiri kare 

Ubutumwa burebure Miss Vanessa yanditse ku rukuta rwe rwa Instagram