Ku wa Mbere ni bwo hakomeje imikino ya 1/8 y’iki Gikombe cya Afurika cya 2025. Saa Kumi n'Ebyiri kuri Stade Adrar ikipe y’igihugu ya Misiri yahakiniye na Benin mu mukino wabanje kugorana ku mpande zombi dore ko iminota 90 yarangiye ari igitego 1-1 aho Misiri yari yatsindiwe na Marwan Attia ku munota wa 69 ahawe umupira na Mohamed Hany naho Benin yishyurirwa na Jodel Dossou.
Mu minota 30 y’inyongera ibintu byahinduye isura ku ikipe y’igihugu ya Misiri ubundi itangira kurusha Benin cyane. Ku munota wa 97 Yasser Ibrahim yahise atsinda igitego cya kabiri ahawe umupira na Marwan Attia ubundi ku munota wa 120+4 Mohamed Salah atsinda icya gatatu ahawe umupira na Zizo.
Umukino warangiye ikipe y’igihugu ya Misiri itsinze Benin ibitego 3-1 ihita ikomeza muri 1/4 cy’igikombe cya Afurika gutyo.
Ku munsi w'ejo saa Tatu z’ijoro kuri Fez stadium ikipe ho ikipe y’igihugu ya Nigeria yakinnye na Mozambique. Uyu mukino woroheye cyane Nigeria dore ko yawutsinze ku bitego 4-0. Ni ibitego bya Ademola Lookman ku munota wa 20 ahawe umupira na Akor Adams,Victor Osimhen ku munota wa 25 na 47 ndetse na Akor Adams ku munota wa 75.
Ikipe y’igihugu ya Misiri muri ¼ izakina n’ikipe izava hagati ya Cote d’Ivoire na Burikina Faso mu gihe Nigeria izahura n’izava hagati ya Algeria na Repubulika Iharanira Demokarasi ya Congo.
Kuri uyu wa Kabiri imikino ya 1/8 cy’igikombe cya Afurika irarangira aho Saa kumi n'ebyiri Algeria irakina na Congo naho Saa Tatu z’ijoro Cote d’Ivoire ikine na Burkina Faso.
Nigeria yerekeje muri 1/4 cy'igikombe cya Afurika
Abakinnyi ba Misiri yerekeje muri 1/4 cy'igikombe cya Afurika bishimira intsinzi