Kuri uyu wa Gatandatu Saa Kumi n'Ebyiri n'iminota 30, nibwo ikipe ya Rayon Sports yari yakiriye Mukura VS mu mukino wo ku munsi wa 22 wa shampiyona y'icyiciro cya mbere mu Rwanda muri Stade Amahoro.
Uyu mukino warangiye Mukura VS yegukanye amanota 3 ku gitego 1 cyabonetse ku munota wa 75 gutsinzwe na Samson Ayilara Oladosu ahawe umupira na Boateng Mensah.
Nyuma y'uyu mukino,Minisitiri w’Ububanyi n’Amahanga w'u Rwanda , Olivier Nduhungirehe usanzwe ari umufana wa Mukura VS dore ko yari yagiye no kuyishyigikira muri Stade Amahoro, yayishimiye abinyujije ku rubuga rwe rwa X.
Yanditse ati"Ndashimira Mukura VS ku intsinzi ya kabiri itsinda Rayon Sports muri shampiyona y'uyu mwaka wa 2024-2025 muri Rwanda Premier League".
Yashimiye kandi abafana bo mu karere ka Gisagara bari baje gushyigikira Mukura VS muri Stade Amahoro.
Yagize ati" Ndashimira byimazeyo abagize itsinda ry'abafana ba Mukura VS ba Save mu karere ka Gisagara, bari banyiri Stade Amahoro kuri uyu mugoroba!".
Ni ku nshuro ya kabiri Mukura VS itsinze Rayon Sports muri uyu mwaka w'imikino dore ko mu mukino ubanza muri shampiyona yari yayitsinze ibitego 2-1.
Kugeza ubu iyi kipe ibarizwa mu karere ka Huye iri ku mwanya wa 5 ku rutonde rwa shampiyona n'amanota 33.
Minisitiri Olivier Nduhungirehe yishimira intsinzi ya Mukura VS