Minisitiri Nelly Mukazayire mu bashyigikiye Tonzi amurika igitabo ‘An Open Jail’ cyatwaye asaga Miliyoni 20 Frw–AMAFOTO+ VIDEO

Byabaye mu ijoro ryo kuri uyu wa Kane tariki 14 Kanama 2025 muri Crown Conference i Nyarutarama mu Mujyi wa Kigali. Ni igitabo cyagiye ku isoko kigura ibihumbi 30 Frw, ndetse yacyanditse mu gihe cy’imyaka 13, byatumye kigeza kuri Paji 174.

Mu bandi bamushyigikiye mu kumurika iki gitabo harimo Umunyamabanga Uhoraho muri Minisiteri y’Urubyiruko n’Iterambere ry’Ubuhanzi, Ngabo Barave; umuhanzikazi wagwije ibigwi mu muziki w’u Rwanda, Mariya Yohana; Tidjara Kabendera; abaramyi nka Gaby Kamanzi; Alex Dusabe witegura igitaramo cye tariki 14 Ukuboza 2025 muri Camp Kigali;

Bosco Nshuti uherutse gukora igitaramo “Unconditional Love Season II’; umukinnyi wa filime, Mugisha Emmanuel wamenye nka Clapton Kibonge; Davis D, umwanditsi akaba n’umushakashatsi ku mateka ya Jenoside yakorewe Abatutsi, Tom Ndahiro; umunyamideli Kabano Franco, Olivier The Legend, umuraperi MD, Dj Spin, n’abandi.

Mu kumurika iki gitabo Tonzi, yifashishije abashyushyarugamba Ntazinda Marcel na Michellle Iradukunda, bombi bakorera Ikigo cy’Igihugu cy’Itangazamakuru. Ibi birori kandi byitabiriwe n’abo mu muryango we, inshuti ze, abanyamakuru bakoranye mu bihe bitandukanye, abayobozi mu nzego zinyuranye, aba- Depite n’abandi.

Minisiteri y’Urubyiruko n’Iterambere ry’Ubuhanzi yashimye umusanzu wa Tonzi

Umunyamabanga wa Leta muri iyi Minisiteri, Ngabo Brave yashimye Tonzi ku bw’umusanzu we wagejeje ku iyandikwa ry’iki gitabo. Ati “Ndashaka gushimira by’umwihariko Tonzi waduteranyirije hano, turishimye, turanezerewe cyane ku bw’iki gitabo nka Minisiteri ishinzwe iterambere ry’ubuhanzi, ikintu cya mbere ni ukugushimira ko wateye iyi ntambwe.”

Ngabo Brave yavuze ko buri wese anyura mu buzima bugoye cyangwa se ibibazo bikomeye ariko buri wese uko abisohokamo, ni byo bituma aba udasanzwe.

Ati “Wabitubwiye neza ko ibibazo byo bihoraho, ariko uko tubinyuramo, niho dusohokana intsinzi. Icyo rero ni igikorwa gikomeye wakoze cyo kudusangiza, kuko igitabo kibaho imyaka ibihe n’ibihe. Ubu rero, hari uri kunyura mu bihe bigoye bijya gusa n’ibyo wanyuzemo, gishobora gufasha kikamubera urumuri.”

Ngabo yavuze ko amwe mu masomo yakuye mu gitabo cya Tonzi yubakiye ku kubwira buri wese kongera kwicyebuka akareba uwo ariwe. Ati “Ndiho ndi inde? Ni ikibazo cyatuma wongera kwicyebuka ukavuga uti ariko ndi uyu wanyuze muri ibi bikomeye, muri ibi bamvuga, muri aya macuma acannye bantera cyangwa ndi undi w’umutsinzi kurusha ibyo ndi kunyuramo, ibyo rero ni akazi gakomeye, ariyo ya ndorerwamu navugaga, udusaba kongera kwirebamo tukicyebuka, tukareka gusandara hirya no hino.”

Ngabo yavuze ko Tonzi akwiye gutekereza uko iki gitabo cyashyirwa mu rurimi rw’Ikinyarwanda, ndetse n’uburyo cyakorwamo filime mbarankuru.

Phanny Wibabara waririmbanye na Tonzi mu itsinda ‘The Sisters’, yashimye Tonzi ku bw’umusanzu we mu iyandikwa ry’iki gitabo, avuga ko gikubiyemo imbaraga kuri benshi bifuza kuva mu nzira y’inzitane kugirango bongere kwiyubaka.

Mu bandi bashimye ibikubiye muri ibi bitabo barimo Tidjara Kabendera waguze ibitabo 10, Mariya Yohana, Maman Eminante, Tom Ndahiro, Mani Martin n’abandi.

Uyu mugoroba uvuze ikintu kinini ku buzima bwa buri wese

Tonzi yavuze ko igitabo cye cyubakiye icyizere, gukomera, ubutwari, kwihangana no kubasha kurenga inzitizi za byinshi, ariko kandi ni amasomo akomeye kuri benshi.

Yasobanuye ko yatangiye yandika iki gitabo yumva ari ibintu byoroshye, ariko byamufashe imyaka 13 kugirango kibe kirangiye. Ati “Mwumve ukuntu bikomeye. Kubera ko ubuhamya cyangwa ubuzima bw’umuntu yanyuzemo, nanjye byambereye urugendo rwo gukira, nabanye nanjye".

"Ntabwo byatangiye numva nzasohora igitabo, ahubwo byatangiye numva ubutumwa budasanzwe buri kunyura, byandika muri ‘Agenda’, hanyuma mu gihe cya Covid-19, nibwo naje gusanga naranditse ibintu bikomeye, naje kubisangiza umuvandimwe wanjye, n’umugabo wanjye, barambwira bati ibi bintu ntabwo wabyihererekana.”

Uyu mugabo yavuze ko mu iyandikwa ry’iki gitabo kugeza gisohotse kuri Paji 174 yakoresheje hafi Miliyoni 20 Frw. Avuga ati “Muri uru rugendo rwo kucyandika, ushobora kubona izi paji 174, ariko hagiyeho hafi Miliyoni 20 Frw. Nari nziko ari nk’indirimbo wishyura ‘Producer’ ariko nasanze atari ko bigenda.”

Yavuze ko aba mbere yari yizeye ko bamukorera igitabo yabishyuye arababura, binagenda uko no ku bandi bantu yegereye ku nshuro ya Kabiri.

Yavuze ko iki gitabo cye kiri mu rurimi rw’icyongereza, ariko agomba no kuzagishyira mu rurimi rw’Ikinyarwanda kugirango kizagera hirya no hino. Ati “Kunshyigikira, ni ugushyira umukobwa. Kunshyigikira, ni ugushyigikira umugore wanze guheranwa."

Igitabo cye “An Open Jail: When the World Crucifies You” – Igihome gifunguye: Iyo isi ikumanika ku musaraba, kirimo inkuru itari isanzwe y’ubuzima yanyuzemo, agahinda, ubwigunge n'ikizere cyavuyemo ubutumwa bukomeye ku bandi.

Yacyanditse gishingiye ku rugendo rwe rwatangiye mu mwaka wa 2012, umunsi yagombaga kwibaruka umwana we wa mbere. Ku bw’ibyishimo n’amatsiko byari byamurenze, Tonzi n’umugabo we bari biteguye kwakira umukobwa wabo. Ariko nk’uko yabyanditse mu gitabo, uwo munsi warangiye mu marira n’agahinda gakomeye, ubwo abaganga babatangarizaga ko umwana wabo yapfuye ataravuka.

Tonzi avuga ko ibyo yabayemo byamushoye mu gihome kidasanzwe – igihome kitagaragara, ariko cyuzuyemo ibikomere byo mu mutima, kwicira urubanza, agahinda gakabije n’ikigugu cyamurwanye igihe kirekire. Ni cyo yise “An Open Jail”, igihome umuntu abamo atari muri gereza nyir’izina, ariko akabaye imbohe y’amarangamutima ye.

Mu gitabo cye, Tonzi agaragaza uko yabuze icyizere, yibaza niba atari we wateje urupfu rw’umwana we, akinjira mu buzima bwugarijwe n’umwijima n’amaganya. Aragira ati: "Nabaye mu kirahure cy’agahinda, nta byishimo na bimwe byumvikaga, n’abo nari nsanzwe nkunda nari narabaye kure yabo."

Ubutumwa bw’iki gitabo burenze inkuru y’agahinda; burimo n’amasomo 15 akomeye yise “imitego” abantu benshi bagwamo igatuma ubuzima bwabo buhagarara. Muri byo harimo ibikomere by’ingo, intambara, gutakaza umwirondoro, ipfunwe, uburwayi n’amateka aremereye nka Jenoside.

Tonzi yanditse ati: “Singufitiye urufunguzo rw’amakarita yawe, ariko ukeneye kumenya ko imbaraga zo kwibohora zari ziri mu maboko yawe kuva kera.”

Mu gice cya “Dedication”, Tonzi yatuye igitabo umugabo we Alfred Gatarayiha (Alpha) n’abakobwa babo Galta, Grania na Talya. Yagize ati: “Urukundo n’inkunga mwangiriye byatumye nshobora kurangiza iki gitabo.”

Yanibutse umwana we w’imfura Talpha wavutse agapfa, ati: “Ni wowe wahaye icyerekezo ubutumwa buri muri iki gitabo. Ruhukira mu mahoro.”

Yagize kandi umwanya wo guha icyubahiro nyina Munyana Ruth waguye muri Jenoside yakorewe Abatutsi mu 1994, n’umuvandimwe Marcel Ngamije utaraboneka kugeza n’ubu.

Mu gice cya "Acknowledgments", yashimiye by'umwihariko mushiki we Angelique Umuhire wamushyigikiye kuva atangiye iyi nkuru, ndetse na Valentine Mudogo wamuteye inkunga mu gutunganya igitabo, hamwe na Musoni Cyusa Nicky na Patrick Cyuzuzo ku bufasha bwabo bw’ingirakamaro.

Tonzi yashimangiye ko iyi nkuru atari iye yonyine, ahubwo ari iy’abantu bose bigeze kuba mu gihome cy’amarangamutima, yaba kubera agahinda, ibikomere, gutakaza umuntu, cyangwa kutababarira.

Ati “Nari mfite uburenganzira bwo kumva ndababaye, ariko ntari ngomba kubigumamo. Imana yampaye imbaraga zo kuva mu gihome cyanjye, none ndashaka gufasha n’abandi kugisohokamo.”

Tonzi amaze imyaka irenga 20 mu muziki wo kuramya Imana, aho yatangiye umwuga we mu 2003. Afite album icyenda, kandi ari gutegura album ya 10, izasohoka ku wa 19 Nzeri 2025.

Noneho yateye intambwe nshya nk’umwanditsi w’ubuhamya bufite umutwaro n’icyerekezo, yifashishije ijambo ry’Imana, uburambe n’umutima ushaka gukiza abandi.

“An Open Jail” si igitabo gusa. Ni inkuru ifungura imiryango y’ibikomere byinshi biba bihishe mu mitima y’abantu benshi, ibibutsa ko hari ubuzima nyuma y’agahinda, kandi ko umuntu wese afite amahirwe yo kubohoka atarinze gusenya inkuta, kuko igihome nyacyo kiba mu mutima.

Uhereye ibumoso: Uwitonze Clementine [Tonzi], Minisitiri wa Siporo, Nelly Mukazayihire [Uri hagati],
ndetse n'umugabo wa Tonzi, Alpha

Abahanzi Mani Martin, Bill Ruzima na Patrick Nyamitari bafashije Tonzi gutaramira abitabiriye ibirori yamurikiyemo igitabo cye cya mbere
Umunyamabanga Uhoraho muri Minisiteri y'Urubyiruko n'Iterambere ry'Ubuhanzi, Ngabo Brave yashimye umusanzu wa Tonzi mu kwandika ibitabo

Umuhanzikazi Mariya Yohana yashimye Tonzi, ariko amusaba gushyira igitabo cye mu rurimi rw'Ikinyarwanda

Umunyamakuru Japhet Mazimpaka [Uri ibumoso] ndetse n'umuhanzi Davis D [Uri iburyo]

Tonzi yavuze ko byamufashe imyaka 13 yandika iki gitabo cye cya mbere

Umuhanzikazi Gaby Kamanzi yashyigikiye mugenzi we wamuritse igitabo

Umushakashatsi kuri Jenoside akaba n'Umwanditsi w'Ibitabo, Tom Ndahiro [Uri hagati]

Umunyamakuru wa RBA, Michelle Iradukunda, niwe wayoboye ibirori byo kumurika igitabo cya Tonzi

Umusangiza w'amagambo akaba n'umunyamakuru wa RBA, Ntazinda Marcel

Umucuranzi wa Saxophone, Israel Papy

Umukindo Protocol yakiriye abitabiriye ibi birori bya Tonzi, ni uku baserutse

Abakinnyi b'ikinamico na filime barimo Umusizi Tuyisenge, Carine watsinze muri ArtRwanda-Ubuhanzi bakinnye umukino ushushanya gusohoka mu gihome cy'amateka

TONZI YASHIMYE ABAMUSHYIGIKIYE MU RUGENDO RWO GUTEGURA NO GUTUNGANYA IGITABO CYE

NGABO BRAVE YASABYE TONZI GUTEKEREZA UKO IGITABO CYE YAGIKORAMO FILIME MBARANKURU