Nk'uko iyi ngengabihe ibigaragaza, igihembwe cya mbere kizatangira ku wa Mbere tariki ya 7 Nzeri 2026, kirangire ku wa Gatanu tariki ya 18 Ukuboza 2026, kikazamara ibyumweru 15. Nyuma yaho abanyeshuri bazahabwa ibiruhuko by'ibyumweru bibiri.
Igihembwe cya kabiri kizatangira ku wa 4 Mutarama 2027 kirangire ku wa 2 Mata 2027, kimare ibyumweru 13. Igihembwe cya gatatu kizatangira ku wa 19 Mata 2027 gisozwe ku wa 2 Nyakanga 2027, kimare ibyumweru 11, mbere y'uko abanyeshuri bajya mu biruhuko by'amezi abiri.
MINEDUC na NESA byanatangaje ingengabihe y'ibizamini bya Leta. Ibizamini ngiro ku banyeshuri bo mu mashami ya PBA, TSS, TTC, ACC na ANP bizakorwa kuva ku wa 31 Gicurasi kugeza ku wa 18 Kamena 2027.
Ibizamini bya Leta bisoza amashuri abanza (PLE) bizaba kuva ku wa 6 kugeza ku wa 8 Nyakanga 2027, mu gihe ibizamini byanditse bisoza amashuri yisumbuye biteganyijwe kuva ku wa 14 kugeza ku wa 23 Nyakanga 2027.
Abashinzwe uburezi bavuga ko iyi ngengabihe izafasha amashuri, abarimu, abanyeshuri n'ababyeyi gutegura neza umwaka w'amashuri, kugira ngo amasomo arangire ku gihe kandi abanyeshuri bitegure neza ibizamini bya Leta.
