MINEDUC na MTN bagiye guha urubyiruko ubumenyi bw’ikoranabuhanga bujyanye n’isoko ry’umurimo

Iyi gahunda ni urubuga rwo kwiga hifashishijwe ikoranabuhanga no guhabwa inama zijyanye n’umwuga, rukaba ruzafasha urubyiruko kwiyungura ubumenyi bufatika bukenewe ku isoko ry’umurimo, bityo biborohere kubona akazi cyangwa kwihangira imirimo. 

DSDJ iri mu bufatanye bwagutse hagati ya MINEDUC na MTN Rwanda bugamije guteza imbere ikoreshwa ry’ikoranabuhanga mu burezi.

Muri ubu bufatanye, impande zombi zizakorana mu gushyira mu bikorwa ingamba zirimo kugabanya cyangwa gukuraho ikiguzi cya internet ku mbuga z’uburezi, gushyiraho ipaki za interineti zihariye z’abarimu, no gutanga interineti ihendutse ku bigo by’amashuri, hagamijwe koroshya kwiga no kwigisha hifashishijwe ikoranabuhanga mu gihugu hose.

Ku bijyanye na gahunda ya Digital Skills for Digital Jobs by’umwihariko, ni imwe mu ngamba za Leta zo kongerera urubyiruko amahirwe yo kubona akazi, guteza imbere ubucuruzi bushingiye ku ikoranabuhanga no gutegura abakozi b’ejo hazaza.

Iyi gahunda izatangwa binyuze muri MTN Skills Academy, aho urubyiruko ruzahabwa amasomo y’ubuntu arimo ubumenyi bw’ibanze mu ikoranabuhanga, kwamamaza hifashishijwe ikoranabuhanga (digital marketing), gusesengura amakuru (data analytics), coding, ubumenyi mu micungire y’imari no kumenya akazi gakenewe.

Ikindi ni uko uru rubuga rutanga amasomo arenga 500 yo kuri internet, agamije gufasha urubyiruko kuva mu kwiga kugera ku kubona akazi cyangwa kwihangira imirimo.

By’umwihariko, iyi gahunda izinjizwa muri porogaramu ya RISE (Resilience in Secondary Education), izafasha cyane urubyiruko rutari mu mashuri kubona amahirwe yo kwiga ubumenyi ngiro bw’ikoranabuhanga, bityo nabo bagire uruhare mu iterambere ry’u Rwanda rishingiye ku ikoranabuhanga. Ibi bizanafasha guteza imbere imishinga mito n’iciriritse (MSMEs) ndetse no kongera ubushobozi bwo kwihangira imirimo.

Iyi gahunda kandi ihuye n’intego za Leta zigaragara muri NST2 na Vision 2050, by’umwihariko mu guhanga imirimo mishya, guteza imbere ikoreshwa ry’ikoranabuhanga kuri bose no gushora mu bumenyi bw’abaturage.

Minisitiri w’Uburezi, Nsengimana Joseph, yashimangiye ko ubufatanye bwa Leta n’abikorera ari ingenzi mu kwihutisha iterambere no guha urubyiruko amahirwe menshi. Ati: "Kugira urubyiruko rufite ubumenyi bw’ikoranabuhanga bujyanye n’igihe ni inkingi y’iterambere ry’igihugu. Ubu bufatanye butuma twagura amahirwe yo kubona ubumenyi bugezweho, hubahirizwa ireme, ukudaheza n’amabwiriza y’igihugu.”

Umuyobozi Mukuru wa MTN, Monzer Ali yavuze ko iyi mikoranire igamije gutuma ikoranabuhanga riba igikoresho gifasha uburezi. Ati: “Turashaka ko ikoranabuhanga rifasha abanyeshuri n’abarimu mu buryo bufatika. Mu gutanga interineti ihendutse, gushyiraho amapaki yiihariye no kongerera urubyiruko ubumenyi bw’ikoranabuhanga, tuba dutegura ejo hazaza h’umurimo n’iterambere ry’u Rwanda rushingiye ku ikoranabuhanga.”

MINEDUC izatanga umurongo ngenderwaho, igenzure ishyirwa mu bikorwa ry’iyi gahunda, mu gihe MTN Rwanda izatanga ubunararibonye mu ikoranabuhanga n’ibikorwaremezo, hagamijwe ko iyi gahunda yunganira neza izindi gahunda za Leta zisanzwe z’uburezi n’iterambere ry’umurimo.

Minisiteri y’Uburezi ku bufatanye na MTN Rwanda batangije ku mugaragaro gahunda nshya yiswe Digital Skills for Digital Jobs (DSDJ)