Ibi
yabigarutseho mu kiganiro Urubuga rw’Itangazamakuru cyabaye ku cyumweru, tariki
ya 15 Ugushyingo 2026, mu gihe ibiciro by’ibiribwa bikomeje kuzamuka ku masoko
yo mu gihugu.
Imibare
y’Ikigo cy’Igihugu cy’Ibarurishamibare (NISR) igaragaza ko mu Ukwakira 2026,
ibiciro by’ibicuruzwa na serivisi mu mijyi byazamutseho 19.5% ugereranyije
n’ukwezi nk’uku kwa 2025. Muri Nzeri 2026, izamuka ryari kuri 17.2%.
Minisitiri
Habimana yavuze ko nubwo izamuka ry’ibiciro rihangayikishije, icy’ingenzi ari
uko mu gihugu hakiri ibiribwa, nubwo hari abaturage batakibasha kubigura nk’uko
bisanzwe kubera ubushobozi buke.
Ati: “Icyo
cy’ibiciro kirahari. Ariko icyo twakwishimira ntabwo turagera aho umuturage
abura ibyo kurya. Ibikomoka ku buhinzi, ibikenerwa mu gutegura amafunguro
birahari. Ikibazo ni abantu bamwe na bamwe, kubera ubushobozi buke, badashobora
kubibona nk’uko bari basanzwe babibona. Hanyuma n’abasanzwe babibona bakabibona
byabahenze.”
Yasobanuye
ko izamuka ry’ibiciro rifitanye isano n’impinduka z’ikirere ndetse n’intambara
yo mu Burasirazuba bwo Hagati, ibintu yavuze ko bigira ingaruka ku isoko
mpuzamahanga.
Minisitiri Habimana yakomeje ahumuriza abaturage, avuga ko nta muntu ukwiye kwihanganira inzara kandi inzego za Leta zishobora kumufasha.
Ati: “Nta
muturage ukwiriye kugira impungenge igihe yaba afite rwose ikibazo gikomeye
atabasha kubona ibimutunga, uwo byabaho inzego zacu ziba ziteguye kumufasha.
Kandi hirya no hino bari kubikurikirana ku buryo tubona ko nta kibazo.”
Yongeyeho
ko Leta yafashe ingamba zo kwitegura ibihe bishobora kugira ingaruka ku
musaruro w’ubuhinzi, zirimo ibijyanye n’imihindagurikire y’ikirere.
Umunyamabanga
wa Leta muri Minisiteri y’Ubuhinzi n’Ubworozi, Dr Uwituze Solange, na we yavuze
ko u Rwanda rufite ibigega by’ibiribwa hirya no hino mu gihugu, ku buryo hari
uburyo bwo guhangana n’ikibazo cy’ibura ryabyo.
Yasabye
abahinzi bafite ubutaka buto kurushaho gukoresha uburyo bwo kuhira kugira ngo
badaheranwa n’ingaruka z’imihindagurikire y’ibihe, cyane cyane mu gihe imvura
itagwa uko bikwiye.
Ati: “Icyo
turimo tureba ko twafatanya gukora, ni ukugira ngo turebe ibishobora kuramirwa
no kuhira. Tugasaba abaturage ko twadukoresho twabahaye two kuhira ahantu hato,
dutangire duhaguruke, twuhire aho bishoboka. Aho bidashoboka, abahinzi bagende
begere abajyanama b’ubuhinzi, barebe ibihingwa babagiraho inama, byerera amezi
abiri kandi birahari.”
Mu gihe
izamuka ry’ibiciro rikomeje kugira ingaruka ku bushobozi bw’abaturage bwo
kugura ibiribwa, Leta ishimangira ko hakenewe gukomeza gufasha abafite
ubushobozi buke no kongera ingamba zo kuzamura umusaruro w’ubuhinzi.
