Nk'uko TMZ yabitangaje, inyandiko nshya z'urukiko zigaragaza ko Michael Blackson yemeye kujya atanga amadolari 4,500 ya Amerika buri kwezi (asaga miliyoni 6 Frw) yo gufasha mu kurera umuhungu wabo witwa Kweku, ugiye kuzuza umwaka umwe w'amavuko.
Uretse ayo mafaranga yo kwita ku mwana, Michael Blackson yanemeye kwishyura amadolari 5,000 y'akoreshejwe na Nadia mu kwishyura abanyamategeko bamuburaniraga muri uru rubanza.
Aya masezerano yemejwe n'urukiko nyuma y'uko impande zombi zemeranyije ku ngingo zose zijyanye no kurera umwana. Michael na Nadia bazagirana uburenganzira busesuye bwo gufata ibyemezo birebana n'ubuzima, uburezi n'imibereho ya Kweku, ndetse n'umwana akajya amarana igihe na buri mubyeyi.
Icyakora, hari ingingo yihariye iri muri ayo masezerano ivuga ko Michael Blackson atemerewe kujyana Kweku hanze ya Leta Zunze Ubumwe za Amerika atabanje kubiherwa uburenganzira bwanditse na Nadia.
Ku rundi ruhande, Nadia yemerewe kujyana umwana mu mahanga, ariko agomba kubanza kubimenyesha Michael mu nyandiko no kumuha gahunda y'urugendo.
Ibi bibaye nyuma y'uko Kweku avutse mu gihe kitageze ku mezi abiri nyuma y'ivuka ry'undi muhungu wa Michael Blackson yabyaranye n'uwahoze ari umukunzi we, Rada Darling. Uwo mwana yitwa Michael Jr.
Nadia Beddini yavuze ko yari amaze imyaka ari inshuti na Michael Blackson mbere y'uko bakundana, ndetse ko bombi bari barumvikanye ku kubyarana. Yavuze kandi ko Rada yari azi neza imiterere y'umubano wabo.
Gusa, Rada Darling we yavuze ko nubwo yari azi ko Michael yagiranaga umubano n'abandi bagore, atigeze amenya uburemere bw'umubano yari afitanye na Nadia kugeza ubwo inda ya Nadia yajyaga ahagaragara mu gihe hafatwaga amashusho ya "Love & Hip Hop."
Nubwo habayeho ayo makimbirane, Rada yavuze ko yifuza ko umuhungu we Michael Jr. yakurana mu rukundo na musaza we Kweku. Kuba Michael na Nadia bumvikanye ku buryo bwo kurera umwana, bishobora gutuma abo bana bombi bakura bafitanye umubano mwiza.
