Michael B. Jordan na Jessie Buckley begukanye ibihembo bikuru mu

Muri uyu muhango wabaye ku Cyumweru tariki ya 15 Werurwe 2026, filime ‘One Battle After Another’ yegukanye igihembo gikuru cya ‘Best Picture’, mu gihe umuyobozi wayo Paul Thomas Anderson yahawe igihembo cya ‘Best Director’

Ku rundi ruhande, filime Sinners yahataniraga ibihembo byinshi kurusha izindi, bigera kuri 16, yaje gutahana bine birimo icya Best Original Screenplay cyahawe umuyobozi Ryan Coogler, icya Best Actor cyahawe Michael B. Jordan, icya Best Cinematography cyegukanywe na Autumn Durald Arkapaw ndetse n’icya Best Original Score cyahawe Ludwig Göransson.

Intsinzi ya Autumn Durald Arkapaw yabaye amateka kuko ari we mugore wa mbere wegukanye igihembo cya ‘Best Cinematography’ muri aya marushanwa.

Mu bihembo by’abakinnyi, Michael B. Jordan yegukanye igihembo cya Best Actor kubera uruhare rwe muri filime ‘Sinners’, mu gihe Jessie Buckley yahawe icya ‘Best Actress’ kubera filime Hamnet.

Mu bindi bihembo byatanzwe, Amy Madigan yahawe igihembo cy’umukinnyi wungirije mwiza mu bagore kubera filime Weapons, mu gihe Sean Penn yegukanye icya Best Supporting Actor kubera uruhare rwe muri One Battle After Another nubwo atari yitabiriye ibirori.

Uyu muhango wanagaragayemo ibihe byo kwibuka bamwe mu byamamare bitabye Imana mu mwaka ushize. Umuhanzikazi Barbra Streisand yatanze icyubahiro cyihariye ku mukinnyi wa filime Robert Redford.

Ibirori byari biyobowe n’umunyarwenya Conan O'Brien, wongeye kubiyobora nyuma yo kubikora bwa mbere mu 2025.

Ababirebye benshi bavuze ko uyu mwaka ibirori byari birimo urwenya rwinshi kandi byari bishimishije kurusha umwaka wabanje.

Nyuma y’umuhango nyirizina, abatsindiye ibihembo n’abandi bitabiriye bakomereje mu birori byo kwizihiza intsinzi bizwi nka Governors Ball, aho abatsinze bashyirwagaho amazina ku bihembo bya Oscars batwaye.

Hari kandi ibirori bikomeye byateguwe n’ikinyamakuru Vanity Fair, bizwi nka Vanity Fair Oscar Party, byabereye muri Los Angeles County Museum of Art aho byitabiriwe n’ibyamamare byinshi byo muri sinema n’imyidagaduro.

Mu byaranze ibi birori harimo n’imyambarire y’ibyamamare yakunzwe cyane n’abakurikiranye uyu muhango ku isi hose.

Aganira n’itangazamakuru nyuma yo gutsinda, Michael B. Jordan yavuze ko igihembo cya Oscar ari intambwe ikomeye mu buzima bw’umukinnyi wa filime ariko ko atari cyo cyari intego ye nyamukuru.

Ati: “Data yajyaga ambwira ati ‘Ntugategereze guhabwa ibintu ku buntu. Kora cyane, ibindi bizaza ubwabyo.’”

Na ho Jessie Buckley, ubwo yageraga mu cyumba cy’abanyamakuru nyuma yo kwegukana igihembo, yavuze ko yishimiye cyane ko muri icyo cyumweru umwana we wa mbere yari amaze kumera iryinyo rya mbere.

Ku ruhande rwa Ryan Coogler, yavuze ko kuva yatangira gutekereza ku nkuru ya Sinners, yahise atekereza ko Michael B. Jordan ari we ukwiriye gukina izo nshingano, cyangwa se kuzakina uwo mwanya. Ati: “Nkibona uko abo bantu bagombaga kuba bameze, nahise menya ko ngomba guhamagara Mike."

Umutekano wari wakajijwe cyane mu mujyi wa Los Angeles mu gihe habaga ibirori bya Academy Awards by’uyu mwaka, bitewe n’impungenge zishingiye ku ntambara iri hagati ya United States na Israel bahanganye na Iran.

Abashinzwe umutekano bari bashyizeho ingamba zikomeye zirimo kugenzura abantu ku byiciro byinshi, kugabanya urujya n’uruza rw’imodoka ndetse no kongera abapolisi bagaragara mu gace ka Hollywood.

No hafi ya Dolby Theatre ku muhanda wa Hollywood Boulevard, hari imodoka z’abapolisi zidasanzwe (SWAT) ndetse n’uruzitiro rw’umutekano ku mihanda myinshi isanzwe igendwa cyane.

BBC yanditse ko abanyamakuru baganaga kuri ibi birori bari bacumbikiwe muri Loews Hollywood Hotel, iri hakurya gato ya Dolby Theatre, aho ibirori byabereye

Umunyamakuru wari uri aho yavuze ko abashinzwe umutekano bari bahagaze hafi buri metero 30. Mbere yo kwinjira mu cyumba cy’ibiganiro aho abakinnyi ba filime bajya kuganira n’itangazamakuru nyuma yo gutsinda Oscars, yabanje kunyura ku mashini ebyiri zipima ibyuma (metal detectors) ndetse n’imbwa za polisi zisaka imizigo.

Mu minsi yabanjirije ibi birori, imihanda imwe n’imwe muri aka gace yari yafunzwe kugira ngo haboneke umwanya uhagije wo gushyiramo tapis itukura (red carpet) n’ibikoresho by’umutekano. Mu bice byinjiriramo ibirori muri Ovation Hollywood, hashyizweho ibikoresho byo kugenzura abantu mbere yo kwinjira.

Nubwo umutekano wari ukajijwe, ahabereye ibirori hari hateguwe mu buryo bwihariye butanga isura y’ikirori gikomeye cya sinema.

Amaduka na resitora byo hafi byari byatwikiriwe n’ibitambo kugira ngo habeho umwanya wa tapis itukura, kandi inzira yinjira muri Dolby Theatre yari irimbishijwe inkingi ndende ziriho amazina ya filime zagiye zegukana igihembo cya Best Picture mu myaka yashize.

Timothée Chalamet ntiyahiriwe n’umugoroba wa Oscars 2026 kuko nubwo yari mu bahatanira igihembo cy’umukinnyi wa filime witwaye neza, yatsinzwe na Michael B. Jordan

Michael B. Jordan yagaragaje ibyishimo byinshi ubwo yari amaze gutangarizwa ko ari we wegukanye igihembo cya Best Actor mu bihembo bya Academy Awards

Nyuma y’uko Adrien Brody asomye izina rya Michael B. Jordan nk’uwatsinze, Timothée Chalamet yagaragaye akoma amashyi nubwo yasaga n’utabyishimiye cyane

Timothée Chalamet yari mu bahatanira Oscar kubera uko yakinnye muri filime Marty Supreme ya Josh Safdie

Umuyobozi w’ibi birori Conan O'Brien yanenze mu buryo bw’urwenya Timothée Chalamet ku magambo aherutse kuvuga ku bijyanye na ‘opera’ na ‘ballet’

Timothée Chalamet yitabiriye ibi birori ari kumwe n’umukunzi we Kylie Jenner

Intsinzi ya Michael B. Jordan yatunguye benshi kuko yari ahanganye cyane na Timothée Chalamet mu cyiciro cya Best Acto

Michael B. Jordan yagize amarangamutima akomeye ubwo yahoberaga nyina Donna Jordan mbere yo kujya ku rubyiniro kwakira igihembo cye

Jessie Buckley yakomeje kwitwara neza mu bihembo bya Oscars 2026, aho yegukanye igihembo cya Best Actress kubera filime Hamnet

Filime One Battle After Another yegukanye igihembo gikuru cya Best Picture, umuyobozi wayo Paul Thomas Anderson agihabwa ari kumwe na Teyana Taylor, mu gihe cyatanzwe na Ewan McGregor na Nicole Kidman

Ryan Coogler yegukanye Oscar ye ya mbere mu cyiciro cya Best Original Screenplay kubera filime Sinners

Paul Thomas Anderson yegukanye igihembo cya Best Adapted Screenplay kubera filime One Battle After Another

Imwe mu ntsinzi yakoze ku mitima ya benshi ni iya Autumn Durald Arkapaw, wegukanye igihembo cya Best Cinematography kubera filime Sinners

Jessie Buckley na Michael B. Jordan berekana ibihembo byabo bya Oscar nyuma yo kuva ku rubyiniro mu birori bya 98th Academy Awards. (Ifoto: Kayla Bartkowski / Los Angeles Times)