Inkuru ya Bluetooth ihuza amateka y'umwami wabayeho imyaka irenga 1,000 ishize n'ikoranabuhanga rikoreshwa n'Isi yose muri iki gihe. Izina Bluetooth rikomoka ku Mwami wa Denmark witwaga Harald Bluetooth Gormsson, wabayeho hagati y'umwaka wa 958 na 986. Uyu mwami azwi cyane mu mateka kubera ko yashoboye guhuza ubwami bwa Denmark na Norway, ibintu byari bigoye muri icyo gihe.
Mu mwaka wa 1994, abashakashatsi bo mu kigo cy'ikoranabuhanga cya Ericsson cyo muri Suwede batangiye gukora uburyo bushya bwo guhuza ibikoresho hadakoreshejwe insinga.
Mu gihe bashakaga izina ry'uyu mushinga, umwe mu bari bawukoraho yatanze igitekerezo cyo kuwitirira Harald Bluetooth, kuko nk'uko uwo mwami yahuje ibihugu bibiri, iri koranabuhanga na ryo ryari rigamije guhuza ibikoresho bitandukanye bikabasha kuvugana.
Nyuma yaho, ibigo bikomeye birimo Ericsson, IBM, Intel, Nokia na Toshiba byashyize hamwe bishinga umuryango uzwi nka Bluetooth Special Interest Group (Bluetooth SIG), ari wo kugeza n'uyu munsi ukurikirana iterambere rya Bluetooth ku rwego rw'Isi.
Abantu benshi batekereza ko Bluetooth ikoresha internet, nyamara si byo
Bluetooth ikoresha imiraba ya radiyo iri ku murongo wa 2.4 gigahertz (GHz). Iyo ufunguye Bluetooth muri telefoni yawe ugahuza na earphones cyangwa speaker, ibyo bikoresho biramenyana, bikabika amakuru yabyo, hanyuma bigatangira kuvugana bitaziguye. Nta internet cyangwa Wi-Fi biba bikenewe muri icyo gihe.
Urugero, iyo ureba indirimbo cyangwa filime wabitse muri telefoni yawe ukoresheje earphones za Bluetooth, internet ntiba iri gukora. Telefoni yawe iba yohereza amajwi muri earphones ikoresheje imiraba ya radiyo gusa. Internet ikenewe gusa iyo ushaka kubanza gukura iyo ndirimbo cyangwa iyo filime kuri YouTube, Spotify cyangwa ahandi.
Mu myaka irenga 25 ishize, Bluetooth yakomeje gutera imbere. Verisiyo za mbere zari zifite umuvuduko muto kandi zikorera ku ntera ngufi. Uyu munsi, verisiyo nka Bluetooth 5.0, 5.2 na 5.4 zishobora guhuza ibikoresho byinshi icyarimwe, zigatanga umuvuduko mwiza ndetse zigakoresha umuriro muke cyane kurusha izabanje.
Hari ikindi kintu gitangaje abantu benshi batazi. Ikirango cya Bluetooth kiboneka kuri telefoni n'ibindi bikoresho ntabwo ari igishushanyo gisanzwe. Cyakozwe hifashishijwe inyuguti ebyiri zo mu nyandiko za kera z'Abanya-Nordic zigereranya inyuguti H na B, zihagarariye amazina ya Harald Bluetooth.
Uyu munsi, Bluetooth ikoreshwa mu bihumbi by'ibikoresho bitandukanye birimo telefone, mudasobwa, imodoka, amasaha y'ubwenge, televiziyo ndetse n'ibikoresho byo mu rugo. Nubwo ikoranabuhanga rikomeza gutera imbere, Bluetooth ikomeje kuba imwe mu nzira zoroheje kandi zihendutse zo guhuza ibikoresho bitandukanye hadakoreshejwe internet cyangwa insinga.
Hashize imyaka irenga igihumbi Umwami Harald Bluetooth abayeho, ariko izina rye rikomeje kubaho binyuze mu ikoranabuhanga rikoreshwa buri munsi n'abantu babarirwa muri za miliyari.
Nubwo benshi batekereza ko Bluetooth ikenera internet, mu by'ukuri ikoresha imiraba ya radiyo ihuza ibikoresho bitandukanye mu buryo bwihuse kandi bwizewe. Ni urugero rwiza rw'uko amateka n'ikoranabuhanga bishobora guhura bikabyara kimwe mu bintu byahinduye ubuzima bw'Isi.