Ibintu by’ingenzi byaranze uyu munsi mu mateka y’isi:
1099: Intambara yera (crusade) ya mbere yaratangiye, ikaba yari intambara yahuzaga abakirisitu b’idini Gatolika n’abayisilamu, yaratangiye itangizwa n’urugamba rwo kubohora umujyi wa Yeruzalemu wari warafashwe n’abayisilamu.
1494: Ibihugu bya Espagne na Portugal byasinye amasezerano y’I Tordesillas, akaba yari agamije kwigabanya umugabane wa Amerika (wari umaze kuvumburwa) hagati y’ibi bihugu 2.
1692: Umujyi wa Port Royal, muri Jamaica, wibasiwe n’umutingito ukaze, mu gihe cy’iminota 3 gusa wamaze uhitana abantu bagera ku 1600 abandi 3000 barakomereka mu buryo bukomeye.
1832: Icyorezo cya Cholera cyari cyaraturutse ku mugabane wa Aziya cyateye mu mujyi wa Quebec muri Canada, kizanwe n’abimukira b’abanya-Ireland, gihitana abantu bagera ku 6000 muri Canada yo hepfo.
1862: Leta zunze ubumwe za Amerika n’ubwongereza byemeranyije guca burundu icuruzwa ry’abacakara.
1892: Umwirabura Homer Plessy, yafashwe azira kuba yaranze guhagurukira umuzungu mu modoka yari igenewe gutwara abazungu gusa.
1893: Mahatma Ghandi, mu ntambara ye yo guharanira ubwigenge bw’abahinde, yatangiye urugamba rwa mbere rwo kwangisha abaturage ubutegetsi bw’abongereza.
1909: Umunyakanada Mary Pickford akaba ari mu bantu batangije sinema I Hollywood (muri Leta zunze ubumwe za Amerika), akaba ari mu bashinze AMPAS (ikigo gitegura ibihembo bya Oscars) yatangiye gukina filime ku myaka 16 y’amavuko. Akaba yaravutse mu 1892 yitaba Imana mu 1979, akaba afatwa nk’umwe mu bakinnyi ba filime isi yagize bakomeye.
1929: Amasezerano yiswe aya Lateran yari yarasinywe hagati ya Leta y’ubutaiyani n’abaturage bo ku butaka bwera, yashyizwe mu bikorwa, akaba ariyo yabaye intandaro y’iremwa ry’umujyi wa Vatican.
1975: Bwa mbere igikombe cy’isi mu mukino wa Cricket cyarafunguwe mu Bwongereza.
1977: Abantu bagera kuri miliyoni 500 barebye ibirori by’isabukuru y’umwamikazi Elizabeth wa 2 w’ubwongereza ubwo yari yujuje imyaka 51 y’amavuko, byatambutswaga kuri televiziyo ku nshuro ya mbere.
1982: Priscilla Presley wari umugore wa nyakwigendera Elvis Presley yafunguye inzu yiswe Graceland ku mugaragaro, iyi ikaba yari inzu Elvis Presley yaguyemo mu mwaka w’1977.
2000: Umuryango w’abibumbye washyizeho umupaka wise imirongo y’ubururu hagati y’ibihugu bya Israel na Liban, uyu ukaba wari umupaka ntarengwa wacungwaga n’umuryango w’abibumbye mu rwego rwo guhosha intambara hagati y’ibi bihugu.
Abantu bavutse uyu munsi:
1911: Brooks Stevens, umukanishi w’umunyamerika akaba ariwe wakoze igishushanyo cy’imodoka yo mu bwoko bwa Wienermobile nibwo yavutse, aza kwitaba Imana mu 1995.
1952: Liam Neeson, umukinnyi wa filime w’umunyamerika ufite inkomoko muri Ireland nibwo yavutse.
1958: Prince, umuhanzi w’umunyamerika nibwo yavutse.
1970: Cafu, umukinnyi w’umupira w’amaguru w’umunyabrazil wamenyekanye mu ikipe y’igihugu mu myaka ya za 2000 yabonye izuba.
1970: Cha Seung-won, umunyamideli akaba n’umukinnyi wa filime w’umunyakoreya y’epfo, wamenyekanye nka Son Hyuk muri filime Athena yabonye izuba.
Abantu bitabye Imana uyu munsi:
1992: Bill France, Sr., umukinnyi w’amasiganwa y’imodoka akaba n’umushoramari w’umunyamerika, akaba umwe mu bashinze ishyirahamwe ry’uyu mukino ryitwa NASCAR yaratabarutse, ku myaka 83 y’amavuko.
1994: Abatutsi biciwe hirya no hino mu gihugu, mu gihe Jenoside yakorewe Abatutsi mu Rwanda yari ikomeje.
2006: Abu Musab al-Zarqawi, icyihebe gikomoka mu gihugu cya Jordaniya, akaba umwe mu bari bakomeye mu mutwe wa Al-Quaeda yitabye Imana, ku myaka 40 y’amavuko.
2012: Lil Phat, umuraperi w’umunyamerika yitabye Imana, ku myaka 20 y’amavuko.
Mutiganda Janvier