Uyu muhango wabaye ku wa
Kane, tariki ya 29 Ukwakira 2026, ku cyicaro gikuru cya FERWAFA, aho ubuyobozi
bwashyikirijwe Me Claudine Gasarabwe uzayobora kugeza habaye Inteko Rusange
idasanzwe izatorerwamo ubuyobozi bushya muri Mutarama 2027.
Mu ijambo rye, Fabrice
Ngoga Shema yashimiye abantu n’inzego zamufashije mu gihe yamaze ayobora
FERWAFA, barimo abagize Inteko Rusange, Minisiteri ya Siporo (MINISPORTS),
Impuzamashyirahamwe y’Umupira w’Amaguru ku Isi (FIFA), iy’Afurika (CAF),
CECAFA, abagize Komite Nyobozi ya FERWAFA, abakozi b’iri shyirahamwe, abatoza,
abakinnyi, abasifuzi n’abakunzi b’umupira w’amaguru, nk'uko byatangajwe ku rubuga rwa FERWAFA.
Shema yavuze ko umupira
w’amaguru mu Rwanda uri gutera imbere, asaba ko ibyo igihugu kimaze kugeraho
byakomeza kubakirwaho kugira ngo urwego rw’uyu mukino rukomeze gutera imbere.
Yagize ati: “Ndashimira
abantu bose bamfashije gusohoza inshingano zanjye. Umupira w’amaguru mu Rwanda
urimo gutera imbere bigaragara, kandi nk’igihugu dukwiye gukomeza kubakiraho
ibyo tumaze kugeraho.
“Sinsezeye ku mupira w’amaguru. Nzajya nkomeza kujya kureba imikino kuri sitade no gushyigikira Amavubi mu bihe bitandukanye. Nizeye ko tuzabona itike yo gukina Igikombe cya Afurika. Dukomeze guteza imbere umupira wacu no kuwishimira.”
Ku ruhande rwe, Me
Claudine Gasarabwe yashimiye Fabrice Ngoga Shema uruhare yagize mu iterambere
ry’umupira w’amaguru mu Rwanda, anavuga ko azakomeza ibikorwa byari
byaratangiye, hagakorwa impinduka aho bizaba ngombwa kandi bigirira akamaro uyu
mukino.
Yashimangiye ko umushinga
bari baratorewe gushyira mu bikorwa utazatereranwa, ahubwo ko uzanozwa aho
bikenewe kugira ngo umupira w’amaguru mu Rwanda urusheho gutera imbere.
Ati: “Umushinga twatorewe
gushyira mu bikorwa ntituzawutererana. Aho bizaba ngombwa, tuzawunoza ku nyungu
z’umupira w’amaguru mu Rwanda. Umwaka ushize twageze ku musaruro mwiza, kandi
turashaka gukomeza kuwubakiraho.
“Icyo dusabwa ni
ugukomeza kunga ubumwe, kubahiriza ubunyamwuga, kunoza imikorere yacu no
kwemera kubazwa inshingano.”
Me Claudine Gasarabwe
azakomeza kuyobora FERWAFA by’agateganyo kugeza muri Mutarama 2027, ubwo hazaba
Inteko Rusange idasanzwe izatorerwamo ubuyobozi bushya bw’iri shyirahamwe.