Kapiteni w’u Bufaransa,
Mbappé w’imyaka 27, yafunguye amazamu ku munota wa 14, atsinda igitego cyiza
ari hafi y’urubuga rw’amahina. Iki cyari igitego cye cya 71 mu mikino 99 amaze
gukina muri iri rushanwa.
Mbappé ubu anganya
ibitego na Raul wahoze ari kapiteni wa Real Madrid, na we watsinze ibitego 71
mu mikino 142 ya Champions League.
Abamuri imbere ku rutonde
ni Karim Benzema ufite ibitego 90, Robert Lewandowski ufite 109, Lionel Messi
ufite 129 na Cristiano Ronaldo ufite 140.
Real Madrid yatsinze
igitego cya kabiri ku munota wa 23, nyuma y’ikosa rikomeye ry’umunyezamu wa
Inter Milan, Josep Martínez.
Martínez yatakaje umupira
nyuma yo kuwuhabwa na Benjamin Pavard, maze kapiteni wa Real Madrid, Federico
Valverde, awumwambura mbere yo kuwutera mu izamu, bituma Real Madrid ijya
imbere ibitego 2-0.
Mbere y’uko igice cya
mbere kirangira, Martínez yakoze amakosa make mu izamu, akora atabara izamu
inshuro ebyiri zikomeye (save) akuramo amashoti ya Mbappé na Jude Bellingham.
Nyuma yaho, igiti cy’izamu na cyo cyakijije Inter Milan igitego cya gatatu.
Inter Milan, yatwaye
shampiyona y’u Butaliyani, yari yatangiye umukino neza. Umunyezamu wa Real
Madrid, Thibaut Courtois, wakinaga umukino we wa 100 muri Champions League,
yakuyemo amashoti ya Hakan Çalhanoğlu na Lautaro Martínez.
Inter kandi yegereye
igitego ubwo Curtis Jones wahoze akinira Liverpool yatega umupira ku giti
cy’izamu. Iyi kipe kandi yashyizemo John Stones, wigeze gutwara Champions
League hamwe na Manchester City mu 2023.
Nk’uko tubikesha BBC
Sport, umukino waranzwe n’amahirwe menshi yo gutsinda ibitego, ariko Jude
Bellingham ananirwa gukoresha uburyo bwiza yabonye bwo gutsinda igitego cya
gatatu cya Real Madrid.
Inter Milan yaje kubona
igitego ku munota wa 77, ubwo Carlos Augusto yatsindaga igitego cyatumye
umukino wongera gushyuha ndetse abafana bategereza ko Inter ishobora kugaruka
mu mukino.
Nubwo Real Madrid
yegukanye intsinzi, abafana bayo ntibishimiye imikinire y’ikipe yabo. Mu bihe
bitandukanye by’umukino, bagaragaje kutishimira uko abakinnyi bari bitwaye.
Intsinzi ya Real Madrid yakomeje amateka yayo muri Champions League, aho iyi kipe imaze gutwara iki gikombe inshuro 15, ari yo kipe yagitwaye inshuro nyinshi kurusha izindi.
