Matovu yapfuye ku wa Kane, tariki ya 24 Nzeri 2026, ubwo yari amaze kugezwa ku Bitaro bya Kibuli nyuma yo gukomereka bikomeye. Polisi ya Uganda yatangaje ko yatangiye iperereza ku rupfu rwe, aho amakuru y’ibanze agaragaza ko ashobora kuba yarakomerekejwe mu mirwano yahuje abantu batatu.
Umuvugizi wa Polisi ya Kampala Metropolitan, Rachael Kawala, yavuze ko iperereza ry’ibanze rigaragaza ko Matovu yagiye ku rugo rw’umugore bivugwa ko bari bafitanye umubano, ahagana saa 5:30 za mu gitondo.
Polisi ivuga ko ubwo Matovu n’uwo mugore bavaga aho bari bari, bahuye n’undi mugabo wari usanzwe afitanye umubano n’uwo mugore. Nyuma yaho hakurikiraho imirwano, Matovu arakomereka bikomeye.
Kawala yavuze ko amakuru yatanzwe nyuma y’ifatwa ry’umugore wari kumwe na Matovu agaragaza ko ibyabaye bishobora kuba byaraturutse ku mirwano hagati y’abo bagabo. Icyakora, yashimangiye ko Polisi itaramenya neza uko iyo mirwano yatangiye n’ibindi byabaye mbere yayo.
Nyuma yo gukomereka, Matovu yafashijwe n’umumotari wa boda boda wamujyanye ku Bitaro bya Kibuli kugira ngo ahabwe ubuvuzi bwihutirwa. Ni ho yaje kugwa.
Umugore wari kumwe na Matovu yahise atabwa muri yombi kandi akomeje gufasha Polisi mu iperereza. Polisi kandi yatangaje ko yamaze kumenya umugabo ukekwaho kugira uruhare muri iyo mirwano, ariko ko yari yahise ahunga aho byabereye. Abapolisi bakomeje kumushakisha kugira ngo afatwe abazwe ku byabaye.
Mbere y’uko Polisi itanga ibisobanuro bishya, yari yavuze ko Matovu yari yatewe n’abantu bataramenyekana ahitwa Kibuli Market Zone B, muri Makindye Division. Sitasiyo ya Polisi ya Kabalagala yahise itangira iperereza ku cyaha cy’ubwicanyi.
Hari n’amakuru yari yatangajwe mbere yavugaga ko Matovu yatewe ubwo yari agiye mu masengesho yo mu gitondo. Icyakora, ibisobanuro bishya bya Polisi byerekana ko ubu iperereza ryibanze ku makuru avuga ko habaye imirwano yaturutse ku mubano w’umugore n’abo bagabo. Polisi yashimangiye ko ayo makuru akiri mu iperereza kandi ko agomba kubanza kugenzurwa.
Moses Matovu yasize amateka akomeye mu muziki wa Uganda, aho umwuga we wamaze hafi imyaka 60. Yavutse ku wa 19 Kamena 1949, atangira gukora umuziki nk’umwuga mu 1967, nyuma akorana na Police Band ndetse na Cranes Band.
Mu 1975, Matovu yagize uruhare mu ishingwa rya Afrigo Band, itsinda ryaje kuba rimwe mu matsinda y’umuziki akomeye kandi amaze igihe kirekire muri Uganda. Yabaye umuyobozi waryo, umuririmbyi, umwanditsi w’indirimbo ndetse n’umucuranzi wa saxophone.
Matovu yakomeje gukora umuziki kugeza mu myaka ye ya nyuma, ndetse yari akiri mu bikorwa bya Afrigo Band ubwo iri tsinda ryizihizaga imyaka 50 rishinzwe mu 2025.
Polisi ya Uganda yihanganishije umuryango wa Moses Matovu, inshuti, abo bakoranaga ndetse n’abakunzi b’umuziki we, mu gihe iperereza ku rupfu rwe rikomeje.
Umuhanzi w’icyamamare muri Uganda, Moses Matovu, wari umuyobozi akaba n’umwe mu bashinze itsinda rya Afrigo Band, yapfuye afite imyaka 77 nyuma yo gukomereka bikomeye mumirwano yabereye mu gace ka Kibuli, i Kampala.