Yabigarutseho nyuma yo gutaramana n'iri torero mu gitaramo
cyiswe ‘Gakondo Iganze’, cyabereye muri Kigali Universe ku wa Gatandatu, tariki
ya 31 Ukwakira 2026.
Abinyujije mu butumwa yashyize hanze, Massamba yagaragaje ko
yashimishijwe n'uburyo Itorero Indashyikirwa rikomeje gukunda inganzo gakondo,
rikayikomerezaho kandi rikayigeza ku bantu benshi.
Yagize ati: “Umuco wo gushima ni mwiza! Nanjye ndabashimiye
ku bwo gukunda inganzo gakondo kandi mukayikomeraho munayisakaza henshi. Ni
harambe Inganzo iganje, ni harambe u Rwanda ngobyi ihetse abayo neza.”
Ubu butumwa bwa Massamba bugaragaza ko yashimye ibikorwa
by'Itorero Indashyikirwa, atari ukuririmbana na ryo gusa, ahubwo anaha agaciro
umuhate waryo wo gukomeza guha umwanya umuziki gakondo mu gihe umuziki
nyarwanda ukomeje gutera imbere mu buryo butandukanye.
Iki gitaramo cyari kibaye ku nshuro ya gatatu, kikaba kiri
muri gahunda y'Itorero Indashyikirwa yo gutegura ibitaramo ngarukakwezi,
bihuriza hamwe abakunzi b'umuco nyarwanda, umuziki, imivugo n'imbyino gakondo.
Umwihariko w'iki gitaramo cyo mu Ukwakira 2026 wari uko
Massamba Intore yari yatumiwe nk'umuhanzi mukuru, agafatanya n'Itorero
Indashyikirwa ndetse n'Itorero Inyamibwa.
Umuvugizi w'Itorero Indashyikirwa, Inkuba Sam, yari aherutse
kuvuga ko gutumira Massamba byari bigamije kongera umwimerere mu gitaramo,
bitewe n'ubumenyi n'uburambe afite mu muziki gakondo.
Yagize ati: “Massamba Intore ni umutoza w'urucyerereza, ndetse
bamwe muri twe yaradukujije. Gukorana na we rero ni ugutanga uburyohe
burushijeho, ni nko kongera ikirungo mu byo kurya.”
Yasobanuye kandi ko gutumira Itorero Inyamibwa muri iki
gitaramo, byari bigamije gufasha abitabiriye kubona umuco nyarwanda mu buryo
bwawo bw'umwimerere, aho kumva indirimbo gakondo gusa zicuranzwe mu buryo
bugezweho.
Ati: “Gushyiramo Itorero Inyamibwa ni muri bwa buryo bwo
kwibanda ku mwimerere wa gakondo, kuko igitaramo cyitwa ‘Gakondo Iganze’.
Urumva izina ry'igitaramo rigomba guhura n'ibyo dutaramira abakitabiriye.”
Yakomeje avuga ko kwitabira iki gitaramo kw'Itorero
Inyamibwa byari gutuma abantu bongera kumva umurindi w'intore, amayugi ndetse
bakabona n'imbyino ziranga umuco nyarwanda.
Ibi bitaramo bigamije kugeza umuco gakondo ku bantu b'ingeri
zitandukanye, kuva ku rubyiruko kugeza ku bakuze, kugira ngo utazima.
Ni n'umwanya ufasha abahanzi bakiri bato kwigira ku bakuru
babanjirije mu muziki gakondo, bakamenya inkomoko y'ibihangano byabo ndetse
bakagira uruhare mu gukomeza uwo murage.
Abategura ibi bitaramo bahuza umuco gakondo n'ahantu
hagezweho, ariko bagakomeza guha umwanya ibicurangisho biranga umuziki
nyarwanda birimo ingoma, umuduri n'inanga.
Gakondo Iganze ni igikorwa gikomeza kugaragaza uruhare
rw'abahanzi n'amatorero mu gusigasira umurage nyarwanda, binyuze mu bihangano,
imbyino n'ibindi bikorwa by'umuco.
Kuba Massamba Intore yarashimiye Itorero Indashyikirwa nyuma yo gutaramana na ryo, ni ikimenyetso cy'uburyo ibikorwa nk'ibi bifite agaciro mu gukomeza kubungabunga inganzo gakondo no kuyisakaza mu bisekuru bishya.
Massamba Intore yashimiye Itorero Indashyikirwa ku muhate wo gusigasira inganzo gakondo no kuyigeza ku bantu benshi
Mu gitaramo ‘Gakondo Iganze’ cyabereye muri Kigali Universe, Massamba Intore yifatanyije n’Itorero Indashyikirwa mu guha icyubahiro umuziki gakondo nyarwanda
Itorero Indashyikirwa rikora igitaramo ngarukakwezi cya
‘Gakondo Iganze’, rigatumira abahanzi batandukanye hagamijwe guhuza ibisekuruza
no kurinda ko umuco nyarwanda uzima