Mariah Carey yashyize
hanze imyambaro mishya ijyanye na Glitter, harimo umwambaro wanditseho
“Loverboy”, yagaragaye awambaye munsi y’ikoti rikozwe mu ruhu. Icyakora,
icyibanzweho cyane ni imitako yari yambaye.
Urunigi yari yambaye rwakozwe na sosiyete ikora imitako ya Leviev, rukozwe muri zahabu y’umweru ya karati 18 kandi rufite diyama karemano zingana na karati 44.71. Diyama iri hagati muri uru runigi yonyine ifite karati 14.
Nk’uko Leviev yabwiye Page
Six Style, uru runigi rufite agaciro ka miliyoni 1,550,000 z’amadolari.
Ibi bibaye mu cyumweru
cyaranzwe n’imitako ihenze ya Leviev ku byamamare. Mu birori bya MTV VMAs
byabaye ku Cyumweru, Madonna yakiriye igihembo cya Artist of the Year yambaye
urunigi rwa Leviev rufite diyama zirenga karati 115, rufite agaciro ka miliyoni
2.8 z’amadolari.
Na Taylor Swift na we
yagaragaye muri ibyo birori yambaye impeta yihariye ya Leviev yiswe “The
Royale”, ifite diyama zirenga karati 10. Iyi mpeta yakozwe ku buryo bwihariye
kandi ifite amabuye atandatu yo hagati afite imiterere itandukanye, arimo pear,
heart, lozenge, Ashoka, marquise na oval.
Ku ruhande rwa Mariah
Carey, uru runigi yarwambariye hamwe n’impeta ya Van Cleef & Arpels imeze
nk’ikinyugunyugu, azwiho gukunda cyane ndetse akaba ayambara kenshi.
Mu 2020, Carey yabwiye
Naomi Campbell kuri podcast No Filter With Naomi ko iyo mpeta atajya
ayikuramo. Yavuze ko yayihawe na Van Cleef & Arpels mu myaka ishize, ndetse
ko yayambaye no mu gihe yari atwite, nubwo amaboko ye yari yarabyimbye.
Mariah Carey yakomeje
kwerekana ko imyaka 25 ishize asohoye Glitter itamubuza gukomeza
kuwizihiza mu buryo bwihariye, aho imyambaro mishya n’imitako ihenze byabaye
igice cy’uyu munsi mukuru.