Manchester City yanze ubusabe bwa mbere bwa FC Barcelona bwo kugura umukinnyi wo hagati Rodri, nyuma y'aho iyi kipe yo muri Espagne itanze miliyoni 38.5 z'Amapawundi.
Nubwo City ishobora kwemera kugurisha uyu Munya-Espagne w'imyaka 30, amakuru avuga ko ishaka amafaranga arenga miliyoni 60 z'Amapawundi kugira ngo yemere kumurekura.
Rodri asigaje umwaka umwe gusa ku masezerano afitanye na Manchester City, ndetse kugeza ubu ntabwo arongera kuyavugurura, ibintu byakomeje guteza impaka ku hazaza kw'soko ry'igura n'igurisha.
Mu minsi ishize ndetse byavugwaga ko Real Madrid ari yo yari ifite amahirwe menshi yo kumusinyisha, ariko amakuru ya BBC Sport avuga ko Barcelona ari yo yamaze gufata iya mbere nyuma yo kumvikana n'uyu mukinnyi kugira ngo itangire ibiganiro nayo.
Ku wa Gatanu ni bwo Barcelona yohereje ubusabe bwayo bwa mbere, ariko bwahise buterwa utwatsi n'ubuyobozi bwa Manchester City. Amakuru kandi avuga ko ibiganiro hagati ya Rodri na Real Madrid byamaze guhagarara, nyuma y'uko uyu mukinnyi afashe icyemezo cyo guha amahirwe andi makipe.
Rodri umaze igihe ahanganye n'ibibazo by'imvune. Yabanje kugira ikibazo gikomeye cy'ivi cyatumye adakina igice kinini cya shampiyona ya 2024/25, nyuma aza no kugira ikibazo cy'imikaya y'inyuma y'ukuguru.
Icyakora, yagarutse ku rwego rwo hejuru mu Gikombe cy'Isi cya 2026, aho yafashije Espagne kwegukana igikombe cya kabiri cy'Isi ndetse anatorwa nk'umukinnyi mwiza w'irushanwa.
Kuri ubu Rodri uri gukira nyuma yo kubagwa umugongo mu kwezi gushize, biteganyijwe ko azongera gufatanya n'abakinnyi ba Manchester City mu myitozo mu cyumweru gitaha, mu gihe hategerejwe umwanzuro ku hazaza h'uyu mukinnyi.
Ikipe Manchester City na yo ikomeje gushaka uwo yasimbuza, aho iri mu biganiro byo kugura umunya-Maroc w'imyaka 18, Ayyoub Bouaddi ukinira Lille. Gusa amafaranga miliyoni 86 z'Amapawundi Lille isaba aracyabangamiye isozwa ry'iyo gahunda.