Lil Durk, amazina ye nyakuri akaba Durk Banks, afungiye muri gereza ya Leta Zunze Ubumwe za Amerika kuva mu Kwakira 2024. Ashinjwa gutanga amafaranga kugira ngo abantu batanu bice mugenzi we Quando Rondo mu mwaka wa 2022.
Icyakora, muri icyo gitero, uwahitanywe n'amasasu ntiyari Quando Rondo, ahubwo ni mubyara we Saviay'a Robinson, wari kumwe na we.
Mu minsi ishize, ubushinjacyaha bwari bwongeye gutanga ibirego bishya byashoboraga gutuma urubanza rusubikwa. Gusa urukiko rwafashe umwanzuro wo kuburanisha ibyo birego ukwabyo, bituma urubanza nyamukuru rukomeza nk'uko rwari ruteganyijwe.
Umwunganizi wa Lil Durk, Drew Findling, yavuze ko bishimiye icyemezo cy'urukiko, ashimangira ko umukiliya we ari umwere. Yavuze kandi ko biteguye kuburana guhera ku wa 20 Kanama 2026, bizeye ko bazagaragaza ko ibyo aregwa nta shingiro bifite.
Urubanza rwa Lil Durk rukomeje gukurikiranwa n'abatari bake, bitewe n'ubwamamare bwe mu muziki wa Hip-Hop ndetse n'uburemere bw'ibyaha akurikiranyweho.
Lil Durk agiye kuburana nyuma y'uko urukiko rwanze gusubika urubanza rwe