Umwongereza Lewis
Hamilton, wegukanye igikombe cy’Isi cya Formula 1 inshuro zirindwi, yashimye
icyemezo cyo kugarura iri rushanwa rikomeye ry’imodoka muri Afurika, ariko
agaragaza ko hari ibyo atashimye ku kuba u Rwanda ari rwo rwatoranyijwe kwakira
Grand Prix ya mbere kuri uyu mugabane mu myaka 33 ishize.
Nk’uko tubikesha AFP
News, ibi Hamilton yabitangaje ku wa Kane, ubwo yavugaga ku cyemezo cya Formula
1 cyo gusubira muri Afurika, aho iri rushanwa riheruka kuhabera mu mwaka wa
1993.
Nubwo ashyigikiye ko
Afurika yongeye kubona umwanya mu ngengabihe ya Formula 1, Hamilton yagaragaje
ko afite ibyo yibazaho ku guhitamo u Rwanda nk’igihugu kizakira iri rushanwa.
U Rwanda rwagiranye
amasezerano na Formula 1 y’imyaka 10 yo kwakira irushanwa rya Grand Prix,
rikazabera ku kibuga cyihariye kizubakwa mu Karere ka Bugesera, hafi y’Ikibuga
Mpuzamahanga cy’Indege cya Bugesera, mu ntangiriro z’imyaka ya 2030.
Iri rushanwa rizagarura
Formula 1 muri Afurika ku nshuro ya mbere kuva mu 1993, ubwo ryaherukaga kubera
muri Afurika y’Epfo. Biteganyijwe ko uyu mushinga uzafasha guteza imbere
ubukerarugendo, gukurura abashoramari no guhanga imirimo mu Rwanda.