Levixone uherutse kurushinga na Desire Luzinda yagarutse i Kigali mu bikorwa by’umuziki

Levixone umaze kwandika izina rikomeye mu ndirimbo zo kuramya no guhimbaza Imana, yaje i Kigali nyuma y’iminsi mike ahamije isezerano ry’urukundo rwe imbere y’Imana n’umukunzi we, umuhanzi akaba n’umuterankunga w’imishinga ye, Desire Luzinda, basezeranye mu birori byabereye i Kigo muri Uganda, ku wa 15 Kanama 2025.

Ibyo birori byari byiganjemo inshuti za hafi n’imiryango, bikaba byarayobowe na Apostle Grace Lubega. Nyuma yo kurushinga, Levixone yahise akomereza ibikorwa bye by’umuziki mu Mujyi wa Kigali, aho biteganyijwe ko azamara iminsi itari micye.

Producer Yeweeh, uri mu bafite uruhare rukomeye muri iyi Album, yabwiye InyaRwanda ko yishimiye gukorana na Levixone, kuko uretse indirimbo zigize Album ye, hari n’izindi ziri kuri Album ya Yeweeh afatanyijemo n’uyu muhanzi.

Ati: “Yaje muri gahunda yo gukora indirimbo zigize Album ye, ariko nanone hari n’indirimbo ziri kuri Album yanjye yagombaga kuririmbaho. Ni ukuvuga ko yazanywe n’imishinga ibiri itandukanye.”

Kuri iyi Album nshya ya Levixone biteganyijwe ko izaba irimo amazina akomeye mu muziki, barimo Bruce Melodie wo mu Rwanda ndetse na Emmy Vox, umuhanzi uzwi cyane mu ndirimbo zo kuramya no guhimbaza Imana.

Ubukwe bwa Levixone na Desire Luzinda bwabaye ishimangira ry’urukundo rwari rwarahishwe igihe kinini n’aba bombi, none bwabaye umusingi w’icyiciro gishya cy’ubuzima bwabo gushingiye ku rukundo, ukwizera n’intego bahuriyeho. 

Levixone amaze iminsi i Kigali mu rugendo rugamije kuhakorera Album ye nshya

Levixone ari kumwe na Producer Yeweeeh muri Siporo mbere y’uko batangira gukora kuri Album ye

Ku wa 15 Kanama 2025, nibwo Levixone yahamije isezerano rye n’umukunzi we Desire Luzinda 

Desire Luzinda na Levixone bari bamaze igihe bavugwa mu rukundo ariko batarabyerura 

Producer Yeweeh yatangaje ko yishimiye guhabwa amahirwe yo gukora kuri Album ya Levixone

LEVIXONE AHERUTSE GUSOHORA INDIRIMBO IGARAGAZA BIMWE MU BYARANZE UBUKWE BWE