Iyi gahunda yagezweho nyuma y'ubwumvikane bwashyizwe mu ngengo y'imari ya leta, bukemura amakimbirane ya politiki yari amaze imyaka abuza ishyirwa mu bikorwa ry'itegeko rigenga ubucuruzi bw'urumogi.
Mu 2021, Virginia yabaye leta ya mbere yo mu Majyepfo ya Amerika yemereye abantu bakuru gutunga no guhinga urumogi ku rugero runaka. Icyakora, nubwo kurutunga no kurukoresha byari byemewe, nta maduka yemewe yashoboraga kurugurisha, bituma benshi bakomeza kurukura ku isoko ritemewe.
Mu mezi ashize, Guverineri Abigail Spanberger yari yanze umukono ku mushinga w'itegeko wari ugamije gutangiza iri soko, ibintu byaciye intege abakora muri uru rwego. Nyuma y'ibiganiro hagati ya guverinoma n'abadepite, habonetse ubwumvikane bwatumye gahunda ishyirwa mu ngengo y'imari ya leta.
Guhera ku wa 1 Nyakanga 2027, abantu bafite nibura imyaka 21 bazaba bemerewe kugura urumogi mu maduka yemewe n'amategeko.
Urwego rushinzwe kugenzura urumogi muri Virginia ruzatangira kwakira ubusabe bw'impushya guhera ku wa 1 Gashyantare 2027 kugira ngo haboneke igihe cyo gutegura amabwiriza n'igenzura.
Umuntu umwe azemererwa gutunga urumogi rungana na ounces ebyiri (hafi garama 57), avuye ku rugero rwa ounce imwe (hafi garama 28) rwari rusanzwe rwemewe.
Hazatangwa impushya zigera kuri 350 zo gufungura amaduka acuruza urumogi, hagamijwe korohereza abaturage kubona ibicuruzwa byemewe no kugabanya ubucuruzi bwo ku isoko ryihishe.
Uturere two muri Virginia ntituzemererwa kubuza ayo maduka gukorera mu duce twatwo, kandi hazemerwa serivisi zo kugeza urumogi ku bakiriya (delivery).
Ubucuruzi bw'urumogi buzasoreshwa umusoro wa leta wa 6% mu ntangiriro, uzazamuka ukagera kuri 8% guhera muri Nyakanga 2029. Ubuyobozi bw'inzego z'ibanze nabwo buzemererwa kongeraho umusoro uri hagati ya 1% na 3.5%.
Amategeko mashya azashyiraho amabwiriza akomeye yo kurinda abana, harimo gupakira urumogi mu buryo budashobora gufungurwa n'abana, kubuza kwamamaza hakoreshejwe amashusho akurura abana, no kubuza ibicuruzwa bifite ishusho y'inyamaswa, imbuto, ibinyabiziga cyangwa abantu.
Amaduka azasabwa kuba nibura metero zirenga 300 uvuye ku mashuri, ibitaro, ibibuga by'imikino by'abana n'ibigo byita ku banywa ibiyobyabwenge. Abacuruzi bazajya bahanwa bikomeye nibaramuka bagurishije urumogi ku bantu batarageza ku myaka 21, ndetse bashobora no kwamburwa impushya zo gucuruza.
Abasesenguzi bavuga ko iki cyemezo ari intambwe ikomeye mu kubaka isoko ryemewe ry'urumogi muri Virginia. Gusa bavuga ko hakiri ibibazo byo gukemura, birimo uburyo impushya zizatangwa, uko abashoramari bato bazabona amahirwe, ndetse n'uburyo isoko ryemewe rizahangana n'ubucuruzi butemewe.
Niba gahunda izashyirwa mu bikorwa nk'uko biteganyijwe, Virginia izaba imwe mu ntara za mbere zo mu Majyepfo ya Amerika zifite isoko ryemewe ryo kugurisha urumogi ku bantu bakuru, nyuma y'imyaka itanu abaturage bemerewe kurutunga ariko batarashoboraga kurugura mu buryo bwemewe.