Iyi misoro yatangiye gushyirwa mu bikorwa muri Nyakanga 2026, aho ibicuruzwa biva mu bihugu birimo u Bwongereza, u Bushinwa, u Buyapani, Brazil, Taiwan ndetse n'Umuryango w'Ubumwe bw'u Burayi (EU) byashyiriweho umusoro uri hagati ya 10% na 12.5%, hiyongereyeho indi misoro yari isanzweho ku bicuruzwa byinshi.
Ubutegetsi bwa Trump buvuga ko iki cyemezo kigamije guhana ibihugu bidakora bihagije mu kurwanya ikoreshwa ry'imirimo y'agahato mu nganda no mu ruhererekane rw'ubucuruzi.
Ariko mu kirego cyashyikirijwe urukiko, izi leta zivuga ko uwo musoro washyizweho mu buryo bunyuranyije n'amategeko, ziwusobanura nk'icyemezo "kidafite ishingiro, gifashwe mu buryo butubahirije amategeko kandi kidakurikije ibyo amategeko ateganya."
Umuvugizi wa White House, Kush Desai, yavuze ko ubutegetsi bwa Trump bwakoresheje ububasha buhabwa n'amategeko, ashimangira ko ibihugu byananirwa gukumira ibicuruzwa bikozwe hifashishijwe imirimo y'agahato biba biteza ikibazo ubucuruzi bw'Abanyamerika.
Yongeyeho ko Amerika ifite uburenganzira bwo gufata ingamba ku bihugu bidakemura icyo kibazo.
Imisoro ishingiye ku itegeko ryo mu 1974
Iyo misoro yashyizweho hashingiwe ku ngingo ya Section 301 yo mu Itegeko ry'Ubucuruzi rya Amerika ryo mu 1974, riteganya ko Amerika ishobora gufatira ibihano ibihugu bikoresha uburyo bw'ubucuruzi bufatwa nk'ubutubahirije amategeko cyangwa bubangamira inyungu zayo.
Ibiro bishinzwe ubucuruzi bwa Amerika (USTR) bivuga ko iyo misoro ireba hafi 99.4% by'ibicuruzwa Amerika itumiza mu mahanga. Nyamara, abareze bavuga ko ubutegetsi bwa Trump buri gukoresha ikibazo cy'imirimo y'agahato nk'urwitwazo rwo gukomeza gahunda y'imisoro itemewe n'amategeko.
Abayobozi bamaganye iki cyemezo
Guverineri wa Leta ya New York, Kathy Hochul, yavuze ko iyo misoro ari "umusoro uremereye ushyirwa ku miryango y'Abanyamerika ikora cyane", aho kuba igihano ku bihugu by'amahanga.
Na ho Umushinjacyaha Mukuru wa Oregon, Dan Rayfield, yavuze ko abaturage n'ubucuruzi bwo muri Amerika ari bo bari kwishyura ingaruka z'iyo misoro, aho kuba ibihugu yashyiriweho.
Ibihugu byibasiwe na byo byamaganye iyo misoro
Ibihugu byinshi byashyiriweho iyo misoro na byo byatangaje ko bitanyuzwe n'icyemezo cya Amerika.
Brazil n'u Buyapani byavuze ko iyo misoro idafite ishingiro, mu gihe u Bushinwa bwatangaje ko Amerika iri gukoresha ikibazo cy'imirimo y'agahato nk'urwitwazo rwa politiki.
Umuvugizi wa Minisiteri y'Ububanyi n'Amahanga y'u Bushinwa, Mao Ning, yavuze ko ibyo Amerika ikora ari "uburyo bwo gukoresha politiki mu nyungu zayo."
| Igihugu | Imisoro |
|---|---|
Algeria | 12.5% |
Angola | 12.5% |
Argentina | 10% |
Australia | 12.5% |
Bahamas | 12.5% |
Bahrain | 12.5% |
Bangladesh | 10% |
Brazil | 12.5% |
Cambodia | 10% |
Canada | 10% |
Chile | 12.5% |
China | 12.5% |
Colombia | 12.5% |
Costa Rica | 12.5% |
Dominican Republic | 12.5% |
Hari impungenge ku ishingiro ry'iyi gahunda
Nk’uko tubikesha BBC News, abasesenguzi bamwe bavuga ko bigoye kugaragaza uburyo ibihugu byakwemeza ko byamaze gukemura burundu ikibazo cy'imirimo y'agahato, bityo bakibaza niba iyi gahunda izatanga umusaruro.
Iyi misoro ni imwe mu ngamba z'ubucuruzi Perezida Trump yakomeje gufata kuva yasubira ku butegetsi muri Mutarama 2025.
Mu mwaka ushize, indi misoro yari yarashyizweho ku munsi Trump yise "Liberation Day" yaje guteshwa agaciro n'Urukiko rw'Ikirenga rwa Amerika, bituma ibigo byinshi bisubizwa miliyari z'amadolari byari byaratanze nk'imisoro.
Nubwo bimeze bityo, Trump akomeje gushimangira ko imisoro ku bicuruzwa bitumizwa mu mahanga irengera inganda z'Abanyamerika, ikarushaho guteza imbere ubukungu bw'igihugu.
Ubutegetsi bwe kandi buri gukora iperereza ku bihugu 16 bushinja kugira inganda zitanga umusaruro urenze ubushobozi bw'isoko, ibintu bishobora gutuma hashyirwaho indi misoro mishya mu gihe kiri imbere.