Leonid Radvinsky wari nyiri ‘OnlyFans’ izwiho gutangaza amashusho y’urukozasoni yitabye Imana

Amakuru y’urupfu rwe yemejwe n’ubuyobozi bwa OnlyFans, bwatangaje ko “yitabye Imana nyuma y’igihe kinini arwaye indwara ya kanseri,” bunasaba ko umuryango we wahabwa umwanya ukwiye muri iki gihe.

Leonid Radvinsky yavukiye muri Ukraine, ariko aza gukurira muri Leta Zunze Ubumwe za Amerika, mu mujyi wa Chicago. Yari atuye mu Bwongereza.

Mu 2018 ni bwo yaguze OnlyFans, ayigura ku bayishinze b’Abongereza, ayinjiza mu cyiciro cy’imbuga zikomeye zinjiza amafaranga menshi ku isi.

OnlyFans yashinzwe mu 2016 nk’urubuga rufasha abahanga mu bintu bitandukanye (creators) gusangiza abakunzi babo ibikubiyemo birimo amashusho n’amafoto y’urukozasoni, bakabishyura amafaranga ya buri kwezi cyangwa bakohereza impano (tips).  

Nubwo rutangazwaho ibintu bitandukanye birimo guteka, siporo n’imyitozo ngororamubiri, rwamenyekanye cyane kubera ibijyanye n’amashusho y’urukozasoni ndetse n’uburyo rwatumye uru rwego rwiyubaka mu buryo bushya kuri internet.

Kwamamaza no gukoresha uru rubuga byazamutse cyane mu gihe cya COVID-19, aho abantu benshi bari mu rugo, bituma abarwitabira n’abarukoresha biyongera ku muvuduko munini.

Nyuma y’imyaka itatu gusa, Radvinsky yahise agaragara ku rutonde rw’abaherwe rukorwa na Forbes buri mwaka.

Mu mibare iheruka gutangazwa, OnlyFans yinjije miliyari 1.4 z’amadolari mu mwaka wa 2024, ivuye mu bikorwa byarenze miliyari 7 z’amadolari byakozwe kuri uru rubuga.

Ifite abasaga miliyoni 377 bayikoresha, mu gihe abarenga miliyoni 4.6 aribo bashyiraho ibikubiyemo. Uru rubuga rufata 20% ku mafaranga yose anyuzwa kuri rwo.

Nubwo intambwe OnlyFans yateye ari nini, ntibyabujije ko ihura n’ibibazo n’igenzura rikomeye, cyane cyane ku bijyanye n’uburyo igenzura imyaka y’abayikoresha.

Mu 2024, urwego rushinzwe kugenzura itumanaho mu Bwongereza, Ofcom, rwayikozeho iperereza ku bijyanye n’uko abana bashobora kuba barageraga ku mashusho y’urukozasoni, biza no gutuma icibwa amande agera kuri miliyoni imwe y’amapawundi.

Hari kandi n’ibirego byagiye bitangwa n’abayikoresha, bamwe bavuga ko bashutswe nyuma yo gusanga ubutumwa batekerezaga ko bandikirana n’ibyamamare byari biri gusubizwa n’abandi bantu bahembwa make. Gusa izi manza ntizigeze zitanga umusaruro ku bayireze kugeza ubu.

Radvinsky yize ibijyanye n’ubukungu muri Kaminuza ya Northwestern, akaba yarabaga muri Leta ya Florida. Uretse OnlyFans, yashoye imari mu bindi bigo by’ikoranabuhanga binyuze muri sosiyete y’ishoramari yitwa Leo.com.

Yari azwi kandi mu bikorwa by’ubugiraneza, aho yatanze inkunga zitandukanye zirimo n’iyo yahaye ikigo Memorial Sloan Kettering Cancer Center kivura kanseri.

Urupfu rwe rusize icyuho mu ruganda rw’ikoranabuhanga n’ubucuruzi bwo kuri internet, cyane cyane mu bijyanye n’iterambere ry’imbuga zishyirwaho ibikubiyemo bishyurwa, aho yagize uruhare rukomeye mu guhindura uburyo bikorwa ku rwego mpuzamahanga.

Umwe mu banyemari bamenyekanye cyane mu ikoranabuhanga, Radvinsky, yitabye Imana azize kanseri