Nk’uko byatangajwe n’umunyamakuru wa ESPN, Shams Charania, LeBron yamaze kumenyesha ikipe ya Los Angeles Lakers ko atazongera kuyikinira mu mwaka w’imikino wa 2026-2027, ahubwo ko ashaka gukomeza umwuga we ahandi nyuma y'imyaka umunani ayikinira.
Ni icyemezo gikomeye cyane kuko LeBron yari amaze gukora amateka mu ikipe y’i Los Angeles, aho yayigejeje ku gikombe cya NBA mu 2020 ndetse akaba umwe mu bakinnyi bakomeye b'inkingi za mwamba bagenderwagaho muri iyi kipe mu bihe bya vuba.
Iyi nkuru ije mu gihe hakomeje kuvugwa ibindi bihuha by’uko uyu mukinnyi w’icyamamare ashobora kwerekeza muri Golden State Warriors, aho yakongera guhurira na mugenzi we Stephen Curry kugira ngo bashinge ikipe y’abakinnyi bakomeye nubwo baba bageze mu myaka ya nyuma y’umwuga wabo.
LeBron James ni umwe mu bakinnyi batwaye amateka ya NBA ku rwego rwo hejuru. Kuri ubu afite ibikombe bine bya NBA 2012, 2013, 2016 na 2020, akaba yarabaye n'umukinnyi w’umwaka inshuro enye mu myaka irenga 20 amaze ari ku rwego rwo hejuru muri shampiyona ikomeye ya Basketball ifatwa nk'iya mbere ku Isi.
Uyu mugabo afite uduhigo twinshi yihariye harimo ko kugeza ubungubu ari uyoboye abamaze gutsinda amanota ku giteranyo, aho amaze gutsinda amanota agera ku 43,440 kuva igihe yatangiye kugeza kuri ubungubu ubwo mu mwaka utaha w'imikino uzaba ubaye inshuro ya 24 agaragaye muri iyi shampiyona.
Lebron James amaze gusezera muri Los Angeles Lakers