Kugeza ubu, Shutkever amaze kugira rekodi 42 za Guinness World Records. Ku wa 4 Kanama 2026, ubwo yari yasuye icyicaro cya Guinness World Records i London mu Bwongereza, yakoze ibigeragezo bitandukanye byo kurya vuba.
Muri ibyo bigeragezo, yashoboye kurya churros umunani mu munota umwe, aba uwakiriye rekodi nshya muri icyo cyiciro.
Yanakiriye indi rekodi yo kurya strawberry nyinshi mu munota umwe, aho yariye garama 613 za strawberry, bingana na hafi ibiro 0.6.
Icyakora, rekodi yagarutsweho cyane ni iyo kurya burrito mu gihe gito, kuko Shutkever yari yarigeze kuyifata mbere.
Shutkever yari yarafashe iyo rekodi bwa mbere mu 2019, ndetse ku wa 9 Gashyantare 2022 yariye burrito imwe mu masegonda 32.35, ubwo yari mu kiganiro cy’irushanwa Lo Show dei Record i Milan mu Butaliyani.
Nyuma yaho, ku wa 22 Ukwakira 2022, Umunyamerika Miki Sudo yamurenzeho gato, arya burrito mu masegonda 31.47, bityo Shutkever atakaza iyo rekodi.
Kuri iyi nshuro, Shutkever yagarutse afite intego yo kongera kuyisubirana, maze abasha kurya burrito mu masegonda 30.75. Yabashije kugabanyaho amasegonda 1.6 ku gihe cye cya mbere, asubirana rekodi yari yarambuwe.
Shutkever yavuze ko kuba yaragiye abona amahirwe atandukanye yo kugerageza guca amateka byamufashije kugera kuri byinshi. Yavuze kandi ko kugira ubushake bwo guhatana ari kimwe mu bintu bimufasha kugerageza no guca rekodi z’isi.
Uko yatangiye umwuga wo kurya vuba
Shutkever yavuze ko yatangiye urugendo rwo guca rekodi ubwo yari amaze gutangiza umuyoboro wa YouTube yakoreragaho ibibazo byo kurya ibiribwa bitandukanye.
Yaje kubona rekodi ya Guinness World Records yo kurya Chocolate Orange mu gihe gito, na we arayigerageza, arayifata amashusho ayashyira kuri YouTube.
Nyuma yaje gutumirwa muri gahunda ya televiziyo Britain’s Favourite Chocolate, aho yasabwe kongera kugerageza guca iyo rekodi ku mugaragaro, imbere y’umucamanza wa Guinness World Records. Yabashije kuyica, avuga ko ari kimwe mu bihe byamushimishije cyane mu buzima bwe, bituma akomeza gukurikirana izindi rekodi.
Nubwo umwuga we ari ukurya mu marushanwa, Shutkever avuga ko siporo n’imyitozo ngororamubiri na byo bifite umwanya ukomeye mu buzima bwe.
Yahoze ari umwubatsi w’imyubakire (architect), ariko nyuma aza guhindura umwuga, aba umwe mu bantu bazwi cyane mu marushanwa yo kurya vuba.
Shutkever yavuze ko akunda gukomeza gukora siporo no kwita ku mirire ye, kuko ari ibintu yabayemo kuva akiri muto. Yavuze ko akurikiza ihame ryo kuringaniza ingano y’ibiribwa umuntu afata n’ingufu umubiri ukoresha.
Kuri we, guca rekodi z’isi ni kimwe mu bintu byamuhesheje ishema rikomeye mu buzima bwe, ndetse avuga ko abona bifite agaciro gakomeye kurusha n’ibyo yagezeho mu masomo ye y’ubwubatsi.
Ubu Shutkever afite rekodi 42 za Guinness World Records, kandi akomeje gutegura ibindi bigeragezo byo guca amateka mu marushanwa yo kurya vuba.
Leah Shutkever yongeye kwandika amateka mu kurya vuba, asubirana rekodi ya burrito