Nyuma y'iminsi bivugwa ko ibintu bitameze neza hagati y'umunyamideli kabuhariwe Kylie Jenner n'umukunzi we Travis Scott, kuri ubu byamenyekanye ko urukundo rwabo rwashyizweho akadomo nyuma yo kumarana imyaka 6 babyaranyemo abana babiri.
Nk'uko byatangajwe n'ibinyamakuru byinshi by'imyidagaduro muri Leta Zunze Ubumwe za Amerika, byatangaje ko Klylie Jenner na Travis Scott batandukanye mu kwezi kwa cumi na kabiri (Ukuboza) k’umwaka ushize, mbere gato y’uko haba iminsi mikuru isoza umwaka.
Kylie Jenner yatandukanye na Travis Scott bamaze kubyarana abana babiri.
Mu kiganiro HollywoodLife yagiranye n'uhagarariye Kylie Jenner unasanzwe uvugira umuryango we mu itangazamakuru, yemeje aya makuru yari amaze iminsi avugwa ku mbuga nkoranyambaga agira ati: ''Ntabwo Kylie na Travis bagikundana, gusa bari gufatanya kurera abana babo''.
Yakomeje agira ati: ''Kylie yari yiteguye kugira intambwe atera mu mubano wabo, ariko Travis ntabwo yari abyiteguye. Ntabwo babashije kubyumvikanaho, bituma bafata umwanzuro wo gutandukana''.
Biravugwa ko Kylie Jenner yifuzaga gukora ubukwe na Travis gusa we atabishaka.
N’ubwo umuvugizi wa Kylie atasobanuye neza intambwe ikomeye uyu munyamideli yifuzaga guterana na Travis Scott, PageSix yatangaje ko amakuru ahari ari uko Kylie Jenner yifuzaga gukora ubukwe n'uyu muraperi bamaze kubyarana kabiri, gusa we akaba atarabikozwaga bigatuma bashwana.
Kylie Jenner yari amaranye imyaka 6 akundana na Travis Scott.
Iyi ni inshuro ya kabiri Kylie Jenner w'imyaka 25 na Travis Scott w'imyaka 31 batandukana, dore ko mu 2020 bigeze gutandukana by'igihe gito bakongera bakiyunga. Batandukanye kandi bari bamaranye imyaka 6 bakundana, ndetse hashize amezi 10 bibarutse umwana wa kabiri w'umuhungu.