Iyi myambaro idasanzwe,
yakozwe n’ikigo cy’Abanyamerika gikora imitako y’agaciro ka hato na hato, Jacob
& Co., yabaye imwe mu byagarutsweho cyane mu myiyereko ya Victoria’s Secret
yabaye ku Cyumweru.
Iyo sutiye, izwi nka Fantasy Bra, igizwe na diyama 91 z’umweru, buri imwe ifite uburemere buri hagati ya karati eshanu na 18. Hagati yayo hari diyama imwe y’umuhondo ifite uburemere burenga karati 75, bituma iba igihangano cy’agaciro gakomeye.
Fantasy Bra
ni imwe mu birango byihariye bya Victoria’s Secret, ikaba imaze imyaka myinshi
ikora imyambaro y’imbere y’abagore irimbishijwe amabuye y’agaciro, igakoreshwa
mu kumurika imideli no gukurura abakunzi b’iki kirango.
Iyi gahunda yatangiye mu mwaka wa 1996. Claudia Schiffer ni we wabaye umunyamideli wa mbere wambaye iyo sutiye mu mafoto yamamaza, mu gihe Elsa Hosk ari we wa nyuma wari wayambaye mu myiyereko yabaye muri 2018.
Izo zombi zari zifite agaciro ka miliyoni imwe
y’amadolari buri imwe, ugereranyije n’iya Kylie Jenner ifite agaciro ka
miliyoni 50 z’amadolari [arenga Miliyari zirenga 73 Frw].
Ibyamamare byitabiriye
imyiyereko
Uyu muhango witabiriwe
n’ibyamamare bitandukanye birimo Timothée Chalamet, Kris Jenner, Nicole Kidman
na Dylan Sprouse, byaje kureba abamurika imideli bamenyerewe ndetse n’abashya
binjiye muri Victoria’s Secret.
Bella Hadid ni we
watangije imyiyereko, yambaye amababa arimbishijwe n’indabo. Joan Smalls na
Candice Swanepoel na bo bari mu banyamideli bamaze igihe bazwi muri iki
kirango, mu gihe Paloma Elsesser na Alex Consani bari mu bashya bakomeje
kugaragaza impinduka mu buryo Victoria’s Secret yifuza kwigaragazamo.
Imyiyereko yaherekejwe
n’ibitaramo bya muzika by’abahanzi barimo itsinda ry’abakobwa Katseye,
umuraperikazi Megan Thee Stallion ndetse n’umuhanzikazi Tate McRae.
Alex Consani yavuze ko
amababa abamurika imideli bari bambaye uyu mwaka yari yoroshye kurusha ayo mu
bihe byashize, bituma bagenda neza ku rubyiniro.
Solange Omon yegukanye
amahirwe yo kuba umwe mu ba ‘Angels’
Muri uyu mwaka,
Victoria’s Secret yanatangaje Solange Omon nk’uwatsinze irushanwa ryiswe Angels
Among Us, ryateguwe mu rwego rwo gushaka umunyamideli mushya uzajya
agaragara mu bikorwa by’iki kirango.
Iri rushanwa ryanyujijwe
kuri YouTube mu byumweru byabanjirije imyiyereko. Ryatangiriye mu masoko manini
yo muri Leta Zunze Ubumwe za Amerika, aho abantu benshi bitabiriye igeragezwa
ry’uburyo bagenda ku rubyiniro.
Abakandida basuzumwe
n’akanama karimo Adam Selman, umuyobozi mushya ushinzwe guhanga imideli muri
Victoria’s Secret, Paloma Elsesser, Ashley Graham na Gigi Hadid.
Igice cya mbere cy’iri rushanwa, cyashyizwe kuri YouTube ibyumweru bibiri mbere y’uyu muhango, cyari kimaze kurebwa inshuro zirenga miliyoni eshanu, bigaragaza ko iki kirango kigifite abakunzi benshi.
Victoria’s Secret
irashaka kongera kwiyubaka
Mu myaka ishize,
Victoria’s Secret yahuye n’ibibazo byangije isura yayo, birimo kunengwa uburyo
yagaragazaga ubwiza bw’umugore, ndetse n’impaka zishingiye ku isano ry’iki
kirango na Jeffrey Epstein.
Imyiyereko y’imideli ya
Victoria’s Secret yatangiye mu 1995, ariko ihagarara muri 2019 nyuma y’imyaka
yari imaze ikorwa. Yagarutse muri 2024, igerageza kwerekana impinduka zirimo
guha amahirwe abanyamideli bafite imibiri itandukanye, barimo ababyibushye
ndetse n’abagore bahinduje igitsina.
Nubwo iyo mpinduka
yashimishije bamwe, abandi bayinenze bavuga ko ishobora kuba yari igamije gusa
kugaragaza ko ikirango cyemera abantu bose, aho kuba impinduka zishingiye ku
ndangagaciro zacyo.
Adam Selman, wagizwe
umuyobozi ushinzwe guhanga imideli muri Victoria’s Secret muri Mata 2025, afite
inshingano zo gufasha iki kirango gukomeza kubaka izina ryacyo, gihuriza hamwe
amateka yacyo n’ibitekerezo by’iki gihe ku bwiza, uburinganire no kwemerwa kwa
buri wese.
Mu ntangiriro za 2026,
umuyobozi mukuru wa Victoria’s Secret, Hillary Super, yavuze ko ikigo cyiyemeje
guteza imbere ubudasa mu buryo bufatika, aho kugerageza gusa kuzuza ibisabwa
byose kugira ngo gishimishe abantu.
Izi mpinduka zisa
n’izatanze umusaruro, kuko amakuru yatangajwe na Fortune mu mpeshyi ya 2026
yagaragaje ko agaciro k’imigabane y’iki kigo ku isoko ry’imari kari karikubye
kabiri.
Mu myiyereko yo kuri iki
Cyumweru, Victoria’s Secret yagaragaje ko igikomeje guhuza ubwiza, igikundiro
n’imideli igezweho, mu gihe iharanira kugarura icyizere cy’abakunzi bayo.
Abanyamideli bashya
barimo Ashley Graham, Paloma Elsesser, Alex Consani na Solange Omon bagaragaye
hamwe n’abamaze igihe muri iki kirango, barimo Adriana Lima, wamuritse imideli
ya Victoria’s Secret ku nshuro ya 21.
Kylie Jenner, binyuze muri ya sutiye y’agaciro ka miliyoni 50 z’amadolari, yabaye umwe mu bantu bagaragaje uburyo iki kirango gikomeje gukoresha ibihangano by’agaciro gakomeye n’imyiyereko ikurura abantu benshi mu rugendo rwo kongera kwiyubaka.
